धरानः विराटनगर महानगरपालिका– ५ का रोहित चौधरी हत्याकाण्डमा थप दुईजनालाई प्रहरीले पक्राउ गरेको छ ।
जिल्ला प्रहरी कार्यालय सुनसरीका प्रमुख प्रहरी उपरीक्षक प्रभु ढकालका अनुसार हत्याकाण्डको अनुसन्धानका क्रममा बिहीबार धरान र विराटनगरबाट उनीहरूलाई पक्राउ गरिएको हो ।
प्रहरी उपरीक्षक ढकालले पक्राउ पर्नेमा धरानका प्रकाश लिम्बू र विराटनगरका अज्जु भनिने अजय शर्मा रहेको जानकारी दिए । शर्माले हतियार उपलब्ध गराएको पाइएको प्रहरीले जनाएको छ । चौधरी हत्याकाण्डमा प्रहरीले बुधबार नाइके मानिएको लेटाङ नगरपालिका– १ का दीपक तिमल्सिना र धरान– १४ का अनसन तामाङलाई पक्राउ गरी सार्वजनिक गरेको थियो ।
त्यससँगै थप अनुसन्धानका क्रममा करिब २२ वर्षका लिम्बूलाई धरान र करिब ३० वर्षका शर्मालाई विराटनगरबाट पक्राउ गरिएको ढकालले जानकारी दिए । घटनामा तीनजनाको संलग्न रहेको प्रारम्भिक अनुसन्धानमा खुलेसँगै हत्या प्रकरणमा जोडिएका अन्यको पक्राउमा प्रहरी खटिएको छ ।
मोटरसाइकल रोकेर सेउती पुलनजिक बसेको अवस्थामा लुटेराहरुले युवतीले लगाएको सिक्री मोबाइल र पैसा लुटेका थिए । त्यसक्रममा चौधरीले प्रतिकार गरेका थिए । प्रतिकार गर्दा मुख्य नाइके तिम्सिनाले गोली प्रहार गरेको प्रहरीले जनाएको छ । गोली लागेर घाइते भएका चौधरीको उपचारका क्रममा धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको थियो ।
यसअघि धरान–१४ का ३४ वर्षीय अनसन तामाङ र मोरङको लेटाङ नगरपालिका १ का ३५ वर्षीय पर्वत भन्ने दीपक तिमिल्सिना पक्राउ परिसकेका छन् । गत साउन ५ गते साँझ विराटनगर महानगरपालिका ५ का २८ वर्षीय रोहितको गोली हानी हत्या भएको थियो । उनीहरूले लुटपाटकै रकमले ४० हजारमा भारतको जोगिनीमा गएर पेस्तोल किनेको खुलेको थियो ।