धरानः धरान उपमहानगरपालिका क्षेत्रलाई स्वास्थ आपतकाल घोषणा गर्न सिफारिस गरिएको छ ।
जिल्ला प्रशासन कार्यालय सुनसरीले सो माग गर्दै सिफारिर गरेको हो । प्रमुख जिल्ला अधिकारी हुमकला पाण्डेको अध्यक्षतामा बसेको जिल्ला विपद् व्यवस्थापन समितिले धरानलाई ‘पब्लिक हेल्थ इमर्जेन्सी’ लागू गरेर डेंगुविरुद्ध तीब्र अभियान चलाउन गृह मन्त्रालयमा सिफारिस गरेको हो ।
धरान उपमहानगरको सबैजसो वडामा संक्रमितको संख्या बढेको जनाउँदै प्रशासनले जनस्वास्थ्यको आपतकालीन अवस्था (पब्लिक हेल्थ इमर्जेन्सी) घोषणका लागि गृह मन्त्रालय तथा आन्तरिक मामिला तथा कानुन मन्त्रालय, कोशी प्रदेशलाई अनुरोध गरेको छ ।
प्रजिअ पाण्डेले डेङ्गु संक्रमण बढेपछि तत्काल धरानलाई ‘पब्लिक हेल्थ इमर्जेन्सी’ लागू गर्न सिफारिस गरेको बताइन् । उनले यसअघि पनि पटक–पटक धरानको डेंगी संक्रमणको विषयमा गम्भीर छलफल गर्ने गरेको र अहिले झन् बढेपछि तत्काल धरानलाई ‘पब्लिक हेल्थ इमर्जेन्सी’ लागू गर्न सिफारिस गरेको बताइन् ।
अहिले धरानमा डेगुको संक्रमण तीब्ररुपमा फैलिँदो छ । प्रत्येकजसो घरमा बिरामी छन् । धरान उपमहानगरपालिकाले दिनहुँजसो डेंगुविरुद्धको अभियान चलाइरहेको छ । मेयर साम्पाङ आफैं पनि स्वास्थ्यकर्मीको टोली लिएर अभियान चलाउँदै घर घरमा पुगिरहेका छन् । उनी स्कुल स्कुलमा पनि पुगेर विद्यार्थीलाई लार्भा नष्ट गरौं, लार्भा नष्ट गरौं भनिरहेका मात्रै छैनन् जनताको घरघरमा पनि पुगेर लार्भा नष्ट गर्ने अभियान चलाइरहेका छन् ।
यसअघि मेयर साम्पाङले टिएलओ, धरानका स्कुल सञ्चालकहरुलाई बोलाएर डेंगु नष्ट गर्ने अभियानमा सबैजना लाग्न आग्रह गरेका थिए । तर मेयरको आग्रहलाई टिएलओ र विद्यालयहरुले भने खासै वास्ता गरेको पाइएको छैन ।
हाल धरानमा हजारौंमा डेंगु संक्रमण भइसकेको छ भने ९ जनाको मृत्यु समेत भइसकेको छ ।