विराटनगरः दक्ष फर्मासिस्टहरु गुणस्तरीय स्वास्थ्य प्रणालीका खम्बा भएकोले कसैले पनि आफ्नो लाइसेन्स भाडामा लगाउन नहुने विज्ञ शिक्षक, अध्यनरत विद्यार्थीहरुले गुनासो गरेका छन् ।
मनमोहन प्राविधिक विश्वविद्यालयको मेडिकल एण्ड एप्लाइड हेल्थ साइन्स स्कुलअन्र्तगत स्नातक तहमा बीफार्मेसी अध्यन गरिरहेका विद्यार्थी र विज्ञ शिक्षकहरुले विश्व फर्मासिस्ट दिवसको अवसरमा आयोजित कार्यक्रममा लाइसेन्स भाडामा लगाएर औषधि बेचबिखन गर्दा सिङ्गो पेशा बदनाम भइरहेको गुनासो गरेका हुन् । उनीहरुले देशमा दक्ष फर्मासिस्टहरुको माग उच्च भएकोले उच्च तहको शिक्षामा सबैको पहुँच हुनुपर्नेमा बताएका छन् ।
फर्मासिस्ट तथा मनमोहन प्राविधिक विश्वविद्यालयका फार्मेसी विभाग प्रमुख शाहीविजय रिजालले विना दक्षता र ज्ञान नभएकाहरुले गर्दा फर्मेसी पेशा बदनाम भइहरकोले अनुगनमन गरी विकृति नियन्त्रण गर्नुपर्नेमा जोड दिए । उनले फार्मेसीको लाइसेन्स भाडामा लगाउनु भनेको चिकित्सकले नपढेकोलाई लाइसेन्स भाडामा लगाएर उपचार गराई बिरामीको ज्यान लिनुसरह हो भने । विभागीय प्रमुख रिजाललले पढे लेखेका दक्ष औषधी विज्ञहरुले पर्दा पछाडिको हिरो बनेर काम गर्नुपर्नेमा जोड दिए ।
रजिष्ट्रार डा दिलनाथ फुँयालले मनमोहन विश्वविद्यालयको फार्मेसी ल्याबलाई आफैले औषधि परीक्षण गर्नसक्ने मेघा ल्याबमा स्तरोन्नति गर्न लागेको बताए । उनले देशमा दक्ष फर्मासिस्टहरुको अभावलाई ख्याल गरेर मनमोहनले बीफार्मेसीको पठनपाठन शुरु गरेको र चाँडै व्याचलर अफ नेचुरोपेथी, पब्लिक हेल्थ र केमिकल टेक्नोलोजी विषयमा पनि स्नातक तहको पठनपाठन गर्न लागेको जानकारी गराए । मनमोहनमा अध्ययन गरिरहेका बीफार्मेसीका विद्यार्थीहरु दक्ष फर्मासिस्ट बनेर सेवा दिन सक्षम हुने रजिष्ट्रार फुँयालले विश्वास व्यक्त्त गरे ।
विश्वविद्यालयका कानुनी सल्लाहकार कोषराज न्यौपानेले दक्ष फर्मासिस्टहरुविना समग्र स्वास्थ्य प्रणाली भरपर्दो हुन नसक्ने भएकोले फार्मेसी पेशाको विकृति नियन्त्रण गर्न सरकारले आवश्यक कानुन बनाउनुपर्नेमा जोड दिए । निमित्त परीक्षा नियन्त्रक भीम काफलेले विश्वविद्यालयको परीक्षा प्रणालीलाई गुणस्तरीय बनाउँदै समयमै परीक्षाफल प्रकाशित गर्न आफूहरु निरन्त लागिपरिहने बताए ।
हरेक वर्षको २५ सेप्टेम्बरका दिनलाई विश्व फर्मासिस्ट दिवसका रुपमा मनाउने गरिन्छ । मनमोहनमा बी फार्मेसीमा अध्यनरत विद्यार्थीहरुले कविता र वक्तृत्वकला प्रस्तुत गरेर सोमबार २५ औ विश्व फर्मासिस्ट दिवस मनाएका थिए । उनीहरुले आगामी दिनमा अझै प्रभावकारीरुपले दिवस मनाउने प्रतिबद्धता पनि जनाए ।