धरानः धरानमा नेपाल विज्ञान, प्रविधि प्रज्ञा प्रतिष्ठान (नाष्ट) ले धरानमा विशिष्टकृत अनुसन्धान केन्द्र स्थापना गर्ने भएको छ । धरान उपमहानगरपालिकाको सहकार्यमा केन्द्र स्थापना हुन लागेको हो ।
बुधबार धरान उपमहानगरपालिकाका मेयर हर्कराज राई साम्पाङले धरान–१५ स्थित रेयुकाइको भवन कार्यालयका प्रयोजनका लागि अवलोकन समेत गराएका छन् । मेयर साम्पाङसँगको छलफलपछि प्रतिष्ठानका उपकुलपति प्रा.डा. दिलीप सुब्बालाई सो भवन देखाएका हुन् ।
गत वर्षदेखि सातवटै प्रदेशमा अनुसन्धान केन्द्र स्थापना गर्ने निर्णय भएको र यस वर्ष धरानमा यसको कार्यालय स्थापना गर्न लागिएको उनले जानकारी दिए । केन्द्रले धरानलगायत प्रदेश १ स्तरमा विज्ञान तथा प्रविधि क्षेत्रमा विभिन्न खोज एवं अनुसन्धानका कार्य गर्ने उनले जानकारी दिए । यसले धरानलाई शैक्षिक हब बनाउन सबै लागिरहँदा सहयोग पुग्ने विश्वास समेत लिइएको छ । अब धरानसहित प्रदेश १ मा विज्ञान र प्रविधिको अनुसन्धानबाहेक शैक्षिक हब बनाउन, कृषि क्षेत्र, खाद्य प्रविधिलगायत विभिन्न कार्यक्रम हुनेछन् ।
त्यस्तै, केन्द्रले विभिन्न अध्ययन, अनुसन्धान कार्यलाई व्यवस्थित बनाउँदै त्यसमा संलग्न जनशक्तिलाई सहयोग उपलब्ध गराउने छ । धरानस्थित हात्तिसार क्याम्पसको प्रमुख समेत भइसकेका डा. सुब्बाले धरानमा यो कार्यक्रम ल्याएका हुन् । उनी धरान निवासी हुन् । उनको घर धरानस्थित भोटेपुलमा छ ।
नाष्ट भनेको राष्ट्रिय प्रतिष्ठान हो । प्रधानमन्त्री यसको कुलपति रहनेछन् । यो विज्ञान प्रविधिको सर्वोच्च राष्ट्रिय संस्था हो ।