धरानः केन्द्रको निर्देशन नआएसम्म धरान बीपी प्रतिष्ठानका जुनियर रेसिडेन्ट (आवासीय चिकित्सक) हरु पनि सेवामा नफर्किने घोषणा गरेर आन्दोलित भएपछि बीपी प्रतिष्ठान अस्तव्यस्त बनेको छ ।
देशको विभिन्न स्थानका अस्पतालहररुमा डाक्टरमाथि आक्रमण भएको घटनाको विरोधमा धरान स्थित बीपी कोइराला स्वास्थ्य विज्ञान प्रतिष्ठानका जुनियर रेसिडेन्ट (आवासिय चिकित्सक) हरुले पनि एकेडेमिक क्षेत्र, ओपिडी सेवा र इर्मजेन्सी सेवा समेत बहिष्कार गर्दा बिरामीहरुको बेहालको अवस्था भएको हो ।
प्रतिष्ठानका जुनियर रेसिडेन्ट वेलफेयर सोसाइटीका सचिव डाक्टर चन्दन चौधरीले केन्द्रको निर्णय नआएसम्म आफूहरु सेवामा नजाने बताए । पोखरास्थित मणिपाल अस्पतालमा डाक्टरमाथि कुटपिट भएको विरोधमा देशभरका जुनियर रेसिडेन्टहरुले आकस्मिक सेवा, पठनपाठनसमेत छोडेर आन्दोलनमा छन् ।
यसैबीच स्वास्थ्य तथा जनसंख्या मन्त्रालयले चिकित्सकमाथि दुर्व्यवहार तथा स्वास्थ्य संस्थामा आक्रमण गर्ने व्यक्तिलाई कारबाही हुने कानुनी व्यवस्थासम्बन्धी जानकारी समेटिएको सूचना पाटी राख्न सबै स्वास्थ्य संस्थालाई परिपत्र गरेको छ । तस्वीरः लक्ष्मण थापा