धरानः धरानमा १७ सय बढी केजी मिसावट गरिएको अखाद्य बेसार नष्ट गरिएको छ ।
धरान उपमहानगरपालिकाले अनुगमन गर्दा फेला परेको १७४८ केजी मिसावट गरिएको अखाद्य बेसार नष्ट गरिएको अनुगमन अधिकृत वेदप्रसाद सापकोटाले जानकारी दिए । धरान उपमहानगरपालिकाका मेयर हर्कराज राई साम्पाङ, उपमेयर अइन्द्रविक्रम बेघा, प्रहरी, प्रशासनलगायतको उपस्थितिमा सो बेसार धरान–११ स्थित निर्माणाधीन माया धराने साबुन फ्याक्ट्रीको जग्गा प्राङ्गणमा नष्ट गरिएको हो ।
अनुगमनका क्रममा बरामद भएको सो परिणाणको बेसार नष्ट गरिएको उनले जानकारी दिए । गएको भदौ २ गते अनुगमनका क्रममा धरान ११ स्थित चण्डेश्वरी कुटानी पिसानी मिलले १ हजार ७ सय ४८ केजी बेसार मिसावट गरेको पाइएको उनले जानकारी दिए ।
त्यहाँ बेसारमा चामलको खुदी मिसाएर पिसेको पाइएपछि सञ्चालकलाई दुई लाख रुपैयाँ जरिवाना पनि तिराइएको उनले जानकारी दिए । अनुगमन अधिकृत सापकोटाका अनुसार मिल सञ्चालक र व्यापारीले जरिवाना रकम राजश्वमा जम्मा गरेपछि मिसावट गरिएको बेसार नष्ट गरिएको हो । उनले उपभोक्ता हित संरक्षण ऐन २०७५ को दफा ३९ को १ (ख) बमोजिम २ लाख रुपैयाँ जरिवाना गरेको बताए ।
सो मिलबाट यसअघि नै ११ सय २५ केजी मिसावट बेसार बरामद भइसकेको थियो भने सिल गरेर राखिएको अन्य बेसारचाहिँ बिहीबार लगिएको र नष्ट गरिएको उनले जानकारी दिए । उनले खुदीलाई बेसार जस्तो देखाउन फुड कलर समेत मिसाइएको पाइएको जानकारी दिए ।