सुनसरीः सुनसरीको इटहरीमा मोटरसाइकल एकआपसमा ठक्कर खाई दुर्घटना हुँदा एकजनाको मृत्यु भएको छ ।
मृत्यु हुनेमा धनकुटा महालक्ष्मी नगरपालिका ८ का २६ वर्षीय दीपक मिरिङचिङ मगर रहेको कोशी प्रदेश ट्राफिक प्रहरी कार्यालय इटहरीले जनाएको छ । दुर्घटनामा एकजना गम्भीर घाइते भएका छन् भने दुईजना सामान्य घाइते भएको प्रहरीले जनाएको छ ।
मगरको धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको प्रहरीले जनाएको छ । मंगलबार राति इटहरी–३ शान्तिचौकस्थित भित्री पक्की सडक खण्डमा उत्तरबाट दक्षिणतर्फ जाँदै गरेको को३१प ६९४८ नम्बरको मोटरसाइकल र विपरीत दिशाबाट आउँदै गरेको को२१प ६४३१ नम्बरको मोटरसाइकल एकआपसमा जुध्न पुगेका थिए ।
दुर्घटनामा को२१प ६४३१ नम्बरको मोटरसाइकलको पछाडि सवार मगरको मृत्यु भएको हो । मोटरसाइकल चालक इटहरी–३ बस्ने ३० वर्षीय सागर तामाङ गम्भीर घाइते भएका छन् । उनको वीपी प्रतिष्ठानमा उपचार भइरहेको छ ।
यस्तै, को ३१ प ६९४८ नम्बरको मोटरसाइकल चालक मोरङको सुन्दरहरैंचा ९ बस्ने १८ वर्षीय साहिम थापा मगर र इटहरी ४ बस्ने २० वर्षीया स्नेहा सुब्बा सामान्य घाइते भएका छन् ।
तीव्र गतिका कारण दुर्घटना भएको हुनसक्ने प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।