प्रमुख प्रतिपक्षी नेकपा (एमाले) ले सुरु गरेको झुलाघाट–चिवाभञ्ज्याङ ‘समृद्धिका लागि सङ्कल्प यात्रा अन्तर्गतको अन्तिम आमसभा पाँचथरको फिदिममा सुरु भएको छ । आमसभामाअघि एमाले अध्यक्ष केपी शर्मा ओली सहितका नेता तथा कार्यकर्ताहरूको र्‍यालीले फिदिम बजार परिक्रमा गरेको थियो ।
सदरमुकाम फिदिममा आयोजित कार्यक्रमलाई शनिवार दिउँसो अध्यक्ष तथा पूर्वप्रधानमन्त्री केपी शर्मा ओली सम्बोधन गरेका छन् । आफ्नो गृह जिल्ला तेह्रथुमका बासिन्दासँग प्रत्यक्ष भेटघाट गरी उनी फिदिम आइपुगेका हुन् । बिहान फिदिम पुगेका अध्यक्ष ओलीले पुष्पलाल स्मृति परिषद्को कार्यालय उद्घाटन गरेका थिए । कार्यालय उद्घाटन पछि विभिन्न जातीय भाँकीसहितको ¥यालीमा सहभागी हुँदै ओलीले नगर परिक्रमा गरेका थिए ।
जनसभामा विभिन्न साँस्कृतिक कार्यक्रम समेत भइरहेको छ । सभामा सहभागी हुन गाउँ–गाउँबाट झाँकीसहित सहभागी उपस्थित भएका छन् । र्‍यालीमा सहभागीहरूले जातीय पहिरन र पोसाक लगाएका छन् । लिम्बू समुदायको सघन बसोबास रहेको पाँचथर फिदिमको कार्यक्रममा सहभागी हुन ताप्लेजुङसहित इलाम झापालगायतका जिल्लाबाट समेत नेता–कार्यकर्ता सहभागी भए । ‘समृद्धिका लागि संकल्प यात्रा’ को अन्तिम बृहत् आमसभामा बोल्दै अध्यक्ष ओलीले एमालेको एकल बहुमतले मात्रै राष्ट्रिय स्वाभिमान र विकासको समृद्धि आउने बताएका हुन् ।
एमाले सधैं राष्ट्रियताको रक्षाको पक्षमा रहेको बताउँदै उनले जनताको मनोबल माथि उठाउन र विश्वास बढाउन समृद्धिका लागि संकल्प यात्रा सुरु गरेको बताए । ओलीले भने, ‘देश बनाउने संकल्प बोकेको एमालेले मात्रै समृद्ध नेपाल सुखी नेपालीको सपना साकार पार्न सक्छ । त्यसका लागि सबैले हामीलाई सहयोग गर्न आवश्यक छ ।’
उनले एमाले सरकारबाट हटेपछि देशमा अस्थिरता, अराजकता, र अशान्ति बढेर गएको बताए । उनले भने, ‘देश विकास हुन सकेको छैन । देश कङ्गालीतर्फ धकेलिँदैछ । सरकारको बेइमानी चिर्न तपाईंहरूले एमालेलाई विश्वास गर्न जरुरी छ ।’