धरानः संखुवासभामा कानमा लगाएको सुनको रिङ लुट्न वृद्धाको हत्या भएको खुलेको छ । जिल्ला प्रहरी कार्यालय खाँदबारीले वृद्धाको हत्या आरोपमा धरान जिरोप्वाइन्टका ३० वर्षीय दीपेन भन्ने आकाश राईलाई सार्वजनिक गरेको हो ।
खाँदबारी नगरपालिका ९ तुम्लिङटारमा माघ ६ गते स्थानीय ६२ वर्षीया दिलकुमारी घिमिरेको हत्या भएको थियो । राईलाई धरान उपमहानगरपालिका २ देसीलाइनको एक गेस्टहाउसबाट पक्राउ गरिएको प्रहरीले जनाएको छ। पक्राउ परेका राई सोही दिन तुम्लिङटारदेखि भागेको प्रहरीले जनाएको छ ।
राई श्रीमतीसहित तुम्लिङटारमा कोठा भाडामा बस्दै आएका थिए । घटना शंकास्पद भएपछि कोशी प्रदेश प्रहरीबाट तालिम प्राप्त कुकुरको सहयोगमा घटनाको अनुसन्धान गरिएको थियो ।
राईले वृद्धाको हत्या गरी उनको साथमा रहेको आधा तोलाको सुनको रिङ लुटेका थिए । उक्त रिङ राईले धनकुटा पाख्रीबास नगरपालिका ४ बुद्धचौकमा रूपकला ज्वलर्समा ४७ हजार रुपैयाँ बेचेको प्रहरीले जनाएको छ । सोही गहना विवेक ज्वेलरीले पुनः ५८ हजारमा किनेको अनुसन्धानबाट खुलेको छ ।
प्रहरीका अनुसार अरुण तेस्रोमा ज्याला मजदुरी काम गर्ने राई श्रीमतीसहित तुम्लिङटारमा कोठा भाडामा लिएर बस्दै आएका थिए । उनीहरू दुवै जनालाई पनि प्रहरीले नियन्त्रणमा लिएर अनुसन्धान थालेको प्रहरीले जनाएको छ । राईविरुद्ध कर्तव्य ज्यान र चोकी डाँकासम्बन्धी कसुरमा अनुसन्धान भइरहेको प्रहरीले जनाएको छ ।