धरानः सामाजिक स्वास्थ्य क्लिनिकमा मुटुमा लगाइएको पेसमेकरको अवस्था र अवधि सम्बन्धमा समेत निःशुल्क जाँच गरिएको छ ।
परिवर्तनका लागि सामाजिक अभियान, धरानले नियमित रुपमा आयोजना गर्ने गरेको सामाजिक स्वास्थ्य क्लिनिकमा पेस मेकर लगाइएका बिरामीहरुको जाँच गरिएको छ । मुटुका बिरामीहरुका लागि लगाइएको पेस मेकरको आयु, ब्याट्रीको अवस्था र धड्कनको गति समेतको परीक्षण गरिएको अभियानका अध्यक्ष विष्णु बरालले बताए । बरालका अनुसार पाक्षिकरुपमा आयोजना गर्ने गरिएको शिविरमा मुटु, ब्लड प्रेसर र मधुमेहका रोगीहरुको स्वास्थ्य परीक्षण गरिन्छ ।
६० वर्षभन्दा माथिका जेष्ठ नागरिकको स्वास्थ्य क्लिनिकको ५२ औं संस्करण भानुसब्जी तथा फलफूल व्यवसायी संघको सहकार्यमा आयोजना गरिएको हो । शिविरमा वरिष्ठ मुटुरोग विशेषज्ञ डा. प्रशान्त शाहले स्वास्थ्य परीक्षण गरेका थिए । सो क्लिनिकमा ९८ जना जेष्ठ नागरिक बिरामीहरुको स्वास्थ्य परीक्षण गरिएको थियो । कार्यक्रममा सुगर परीक्षण र औषधि वितरण समेत निःशुल्करुपमा गरिएको संयोजक सुशिर बरालले बताए ।
बिरामीहरुको रक्त परीक्षण र रक्तचाप परीक्षण स्टाफ नर्स श्वेता भण्डारी र चेतना परियारले गरेका थिए । शिविरमा वर्षा अग्रवाल, हेम ढकाल, निशान नेपाल, सुनैना आचार्य र सोफिया बजगाईलगायतका अभियन्ताहरुको सक्रिय सहभागिता रहेको थियो । भानुसब्जी ब्यवसायी संघका अध्यक्ष रमा चौहान खतिवडाले यस्तो कार्यक्रममा संस्थाले सहकार्य गर्न पाएकोमा खुशी व्यक्त गरिन् । “आप्mना सदस्यहरुको र अन्य महानुभावहरुको समेत स्वास्थ्य जाँच गर्न पाएकोमा अभियानलाई आभार व्यक्त गर्दछु” खतिवडाले भनिन् ।
परिवर्तनका लागि सामाजिक अभियानले यस प्रकारको सामाजिक स्वास्थ्य क्निनिक धरानका विभिन्न वडाहरु, इनरुवा, चतरा लगायत झापाको झापा गाउँ पालिकामा समेत आयोजना गरिसकेको छ ।