धरानः ठूलो परिमाणमा नेपाली नक्कली नोट बरामद गरेर प्रशंसा कमाएको सुनसरी प्रहरीले बराहक्षेत्र नगरपालिका–९ बाट ठूलो परिमाणमा गाँजा बरामद गरेको छ ।
मंगलबार सुनसरीको बराहक्षेत्र नगरपालिका–९ राजाबासस्थित घाटनजिक कोशीको किनारबाट ४०६ किलो ९४० ग्राम गाँजा बरामद गरेको प्रहरीले जनाएको छ । टाटा सुमो गाडीमा गाँजा रहेको सूचना प्राप्त गरेपछि इलाका प्रहरी कार्यालय महेन्द्रनगरले खटिएको प्रहरीले प्रदेश ०१–०२–००१ ज ४०५० नम्बरको बोलेरो गाडीमा तलासी लिँदा त्यहाँ लुकाई राखेको अवस्थामा गाँजासहितको गाडी बरामद गरेको जनाइएको छ । गाडीभित्र १३ वटा बोरामा गाँजा फेला परेको प्रहरीको भनाई छ ।
गाँजाको कारोबारमा संलग्न दुई जनालाई प्रहरीले पक्राउ समेत गरेको प्रहरीले जनाएको छ । पक्राउ पर्नेमा बोलेरो चालक धरान–४ का २५ वर्षीय सूर्य राई र भोजपुरको हतुवागढी गाउँपालिका–८ का २७ वर्षीय लक्ष्मण राई रहेका छन् ।
उनीहरुलाई नियन्त्रणमा लिन प्रहरीले दुई राउण्ड फायर समेत गर्नुपरेको सुनसरी प्रहरीले जनाएको छ । प्रहरीले पक्राउ गर्दा टाटा सुमो गाडी चलाई भाग्न खोजेपछि प्रहरीले २ राउन्ड फायर गरी उनीहरूलाई नियन्त्रणमा लिइएको इलाका प्रहरी चक्रघट्टीले जनाएको छ । प्रहरी अनुसार फायरबाट मानवीय क्षति भएको छैन ।
आइतबार समेत सुनसरी प्रहरीले धरानबाट १६३ किलो गाजासहित दुई जनालाई पक्राउ गरेको थियो । त्यसैगरी सोमबार पनि १४९ किलो गाजासहित १२ जना भारतीय नागरिक परेका थिए ।
पक्राउ परेकाहरू माथि जिल्ला अदालत सुनसरीबाट म्याद थप गरी विस्तृत अनुसन्धान भइरहेको प्रहरीले जनाएको थियो । दुई दिनअघि पनि सुनसरी प्रहरीले धरानबाट १ सय ६३ किलो गाँजासहित दुई जनालाई पक्राउ गरेको थियो भने सोमबार पनि १ सय ४९ किलो गाँजासहित १२ जना भारतीय नागरिकलाई पक्राउ गरेको थियो ।
इलाका प्रहरी कार्यालय महेन्द्रनगरको प्रहरी निरीक्षकको कमान्डमा खटिएको प्रहरी टोलीले गाँजा र दुई जनालाई नियन्त्रणमा लिएको हो ।