विराटनगरः मोरङको बुढीगंगा गाउँपालिकामा भएको दुःखद घटनामा तीन जना बालबालिकाको ज्यान गयो । बुढीगंगा–४ प्रगति टोलमा सुनसरी–मोरङ सिँचाइ योजनाको नहर हुँदै कोयलपुर जाने सडक खण्डमा मार्बल उद्योगको कच्चापदार्थ ढुंगा बोकेको लहरी पल्टिँदा तीन बालबालिकाको ज्यान गएको हो ।
सडकको किनारामा जोडिएको ज्योति अधिकारीको घरमाथि २५ टनको ढुंगा बोकेको लहरी पल्टिएको थियो । आर.जे.२९ जी.बी. १५६१ नम्बरको लहरी कोशी राजमार्गको नेमुवाबाट कोयलपुरतर्फ जाँदै गर्दा दुर्घटना भएको थियो ।
उक्त लहरी पल्टिँदा त्यहाँबाट उछिट्टिएको २५ टनको ढुंगाले अधिकारीको चार वर्षीया छोरी इसिता अधिकारी, छोरा निशान्त अधिकारी र अर्की सात वर्षीय बालिका रिया खवासलाई किचेको थियो ।
मृतक इसिता र निशान्त ५५ वर्षीय ज्योति अधिकारीका जुम्लिया छोराछोरी हुन् । लामो समय सन्तान नभएपछि उनले जीवनको पाँच दशक पार गरेपछि आइभिएफ मार्फत जुम्ल्याहा बच्चा पाएका थिए । आफ्ना जुम्ल्याहा बच्चाको ज्यान गएसँगै अधिकारी आफू पनि घाइते छन् । प्रहरीका अनुसार मृतक दाजु बहिनी घरको प्यासेजमा खेलिरहेका थिए । अर्की बालिका खवास भने पसलमा बाबुसँग सामान किन्न पुगेकी थिइन् ।
८ ठूला–ठूला ढुङ्गाले किचेपछि तीनजना बालबालिकाको घटनास्थलमै मृत्यु भएको थियो भने ज्योति घाइते भए । उनको खुट्टा ढुंगाले किचेको थियो । उनलाई करिब ५ घण्टापछि उद्धार गरी विराट मेडिकल कलेजमा भर्ना गरिएको छ । साढे ७ बजे ढुङगाले किचेको दाहिने खुट्टा तीन वटा क्रेनको सहयोगले अधिकारीलाई १ बजे उद्धार गरेर अस्पताल ल्याइएको थियो ।
उद्धारमा समय लागेपछि घाइते अधिकारीलाई घटनास्थलमै अक्सिजन लगाएर राखिएको थियो । प्रहरीले क्रेनको सहायताले लरीलाई हटाएर मृतक बालबालिकाको शव भने ६ घण्टा पछि २ बजे निकालेको थियो । इसिता र निशान्त बुढी गंगामा रहेको स्मृति बोर्डिङ स्कुलमा कक्षा नर्सरीमा अध्ययनरत थिए । रिहा सरस्वती स्कुलमा कक्षा १ मा अध्ययनरत थिइन् । अधिकारी दम्पती पसल सञ्चालन गर्दै प्रगति टोलमा बसेका थिए । आफ्ना सन्तान बितेपछि अधिकारी परिवार विक्षिप्त छन् ।
घटनापछि लरी चालक फरार छन् । फरार भएका चालकको खोजी जारी रहेको प्रहरीले जनाएको छ । ओभर लोड भएको लरी साँघुरो र निर्माणाधीन सडक भएका कारण दुर्घटनामा परेको प्रहरीले प्रारम्भिक निष्कर्ष निकालेको छ ।
‘क्षमता भन्दा बढी लोड र अहिले निर्माणाधीन सडकका कारणले अनियन्त्रित भएर दुर्घटना भएको प्रारम्भिक अनुसन्धानबाट देखिएको छ,’ मोरङका प्रहरी प्रवक्ता तथा डीएसपी रञ्जन दाहालले भने, ‘अहिले घटनाको थप अनुसन्धान भइरहेको छ ।’