धरानः पर्यटकीयस्थल भेडेटारमा स्काइवाक सञ्चालनमा आएको छ ।
शुक्रबार कोशी प्रदेशका मुख्यमन्त्री हिक्मतकुमार कार्की, धरान उपमहानगरपालिकाका मेयर हर्कराज राई, साँगुरीगढी गाउँपालिकाका अध्यक्ष जितेन्द्र रुम्दाली राईले रिवन काटेर संयुक्तरुपमा स्काइवाकको उद्घाटन गरेका छन् ।
आन्तरिक तथा बाह्य पर्यटकको लागि हब नै मानिने भेडेटारलाई थप आकर्षक बनाउने लक्ष्यले स्काइ वाक निर्माण गरिएको हो । धनकुटा र सुनसरीको सीमानामा पर्ने भेडेटारमा रहेको भ्यू टावर भत्काएर स्काइवाकका लागि संरचना बनाइएको हो । कोशी प्रदेश लगानी प्राधिकरणले २५ वर्षका लागि अनुमति दिएको सो परियोजना वण्डर्स अम्युजमेन्ट पाक्र्स एण्ड अट्याक्सन्स प्रालिले २० करोड रुपैयाँ लागतमा निर्माण गरिएको हो ।
सार्वजनिक निजी साझेदारीमा निर्माण गरिएको कोशी प्रदेशको यो पहिलो परियोजना हो । ५० मिटर लामो स्काइवाक क्यान्टिलिभर टावरको मोडलमा निर्माण भइरहेको हो । जहाँ एक पटकमा दुई सय जना हिँड्न सक्ने बताइएको छ । स्काइवाकको उचाइ एक सयदेखि ५ सय मिटरसम्म र चौडाइ ४ मिटर छ । घुम्तीमा १० मिटर रहने स्काइवाक धरानतर्फ ३९ मिटर लामो छ ।
भेडेटारमा निर्माण भएको यो स्काइ वाक दक्षिण एसियाकै साहसिक पर्यटकीय परियोजना हुने र भेडेटारको पर्यटन प्रवद्र्धनमा महत्वपूर्ण भूमिका खेल्ने अपेक्षा गरिएको छ ।
कोशी प्रदेश लगानी प्राधिकरण, धनकुटाको साँगुरीगढी गाउँपालिका र सुनसरीको धरान उपमहानगरपालिकाको समन्वयमा उक्त स्काइवाक निर्माण गरिएको हो । करिब २० करोड रुपैयाँको लगानीमा स्काइवाक निर्माण गरिएको परियोजनाका कार्यकारी निर्देशक सञ्जीव रोकाहले जानकारी दिए ।
धनरान र धनकुटाको सिमानामा अवस्थित धनकुटाको साँगुरीगढी गाउँपालिका वडा नं ६ मा ११ रोपनी वन क्षेत्रफलमा रु २० कारोड लगानीमा टावर निर्माण गरिएको परियोजनाका कार्यकारी निर्देशक सञ्जिव रोकाहाले जानकारी दिए । आगामी दिनमा यस टावरमा बञ्जी जम्प, जीपलाइन र फ्रिफल जस्ता साहसिक खेल सञ्चालनमा ल्याइने उनले बताए ।
स्काइवाक सञ्चालनमा आएसँगै कोशी प्रदेशको आर्थिक गतिविधि बढ्ने र पर्यटन प्रवद्र्धनमा पनि थप टेवा पुग्ने मुख्यमन्त्री कार्की बताउँछन् । उनले प्रदेशले मनाउन लागेको ‘पर्यटन वर्ष, २०८२’ लाई यस परियोजनाले महत्वपूर्ण भूमिका खेल्ने उनको कथन थियो ।
कार्यक्रममा बोल्दै धरान उपमानगरपालिकाका मेयर साम्पाङले धरान र भेडेटारको एक आपसमा सम्बन्ध रहेको बताउँदै भेडेटारमा पर्यटक बढे धरानलाई पनि फाइदा पुग्ने बताए । अध्यक्ष रुम्दाली राईले यहाँ स्काइवाक सञ्चालनमा आएपछि पर्यटक थप बढ्ने विश्वास लिइएको बताए ।