धरानः धरानस्थित बीपी कोइराला स्वास्थ्य विज्ञान प्रतिष्ठानमा कोरोना संक्रमित संक्रमितलाई अस्पतालले बेवास्ता गरेको संक्रमितले गुनासो गर्न थालेका छन् ।
अस्पतालको ‘आइसोलेसन’ कक्षमा उपचारार्थ धरानकी संक्रमितले आफूलाई अस्पतालले कुनै किसिमको हेरचाह नगरेको गुनासो गरेकी हुन् । उनका आफन्त सुनिल राईले हालसम्म अस्पतालले खोजी न निन्दा गरेको गुनासो पोखे । उनले भने, ‘मेरो माइजुको स्वास्थ अवस्था सामान्य छ, उच्च ज्वरो, रुघाखोकी केही छैन । तर पनि डाक्टरहरुले शव राख्ने घरको छेऊमा एउटा कोठामा अलग्गै राखेका छन् । र पानी समेत दिएनन् र सोधपुछ गर्न पनि आएका छैनन् ।’
उनले अस्पतालले खाना समेत नदिएको गुनासो पोखेका छन् । उनले हाम्रो कोशी आवाज डटकमसँगको टेलिफोन सम्पर्कमा अस्पतालको बेवास्ताले गर्दा संक्रमितलाई रातभरी निद्रा पनि नलागेको बताए । ‘कोठामा लगेर थुनिदिएदेखि कोही पनि अहिलेसम्म आइपुगेका छैनन् भनेर माइजुले फोन गर्नुभएको थियो’, उनले फोन सम्पर्कमा भने, ‘खाना समेत नदिएको गुनासो उहाँको थियो, हिजोदेखि त निद्रा नै नलागेर स्लिपिङ टयाब्लेट खाएर सुत्नुभएछ ।’ चिकित्सकले वास्ता नै नगर्दा समस्या मानसिक समस्या बढ्दै गएका उनले बताए ।
उनले प्रतिष्ठानले हौसला र मनोबल बढाउने कार्य पनि नगरेको गुनासो गरे । ‘मैले त बुटवलमा बिरामी नचाएर, खाना खुवाएर गरेको मनोबल बढाएको देखेर खुशी थिएँ तर बीपीमा त हौसला र मनोबल बढाउने काम भएको पनि देखिएन’, उनले थपे, ‘सिधै कोठामा थुनिदिने अनि केही नगर्ने बिरामीलाई त भयो भयो हामीलाई पनि टेन्सन हुन्छ नि ।’
उनले फेसबुकमा म्यासेज गर्दै पनि भनेका छन्–म धरान–१३ निवासी हो र पहिलो कोरोना संक्रमित हाम्रै माइजु हुन् । उहाँलाई घोपा मुर्दा घर छेऊमा राखिएको छ । जान पाइँदैन खाना पनि दिदैन रे । के यही हो त बिरामीलाइ दिएको सुविधा । खाना पनि नदिइ राख्ने यही हो मानवता ? रोगी कोरोनाले भन्दा पनि मानसिक पिरले मर्ने देख्छु म चाहिँ ।’ उनले म्यासेजमा खाना आफन्तले नै लाने गरेको सुनाए । ‘खाना आफन्तले नै लगेर सेक्युरिटी गार्डलाई दिँदै आएका छौं ।’ उनले भने ।
उनलाई जेठ ७ गते कोरोना पोजेटिभको रिपोर्ट आएपछि जेठ ८ गते बिहीबार प्रतिष्ठानको आइसोलेसन कक्षमा लगिएको थियो । उनको हाल स्वास्थ्य अवस्था सामान्य रहेको आफन्तले जानकारी दिएका छन् । ‘यसअघि पनि रुघाखोकी, ज्वरो आदि केहीपनि थिएन र अहिले पनि छैन’, राईले भने ।
उता प्रतिष्ठानका प्रवक्ता डा. निदेश सापकोटाले बिरामीलाई बेवास्ता गरेको भन्ने कुरा ठाडै अस्वीकार गरे । ‘यहाँ आएपछि कहाँ त्यस्तो हुन्छ, गलत कुरा चिनुपर्ने समय छ, गलत कुरा चिरौं ।’ उनले कति जना चिकित्सक संक्रमितको उपचारमा खटिइरहनुभएको छ भन्ने प्रश्नमा केही जवाफ दिएनन् । उनले महिलाका लागि छुट्टै बेड भएकाले एक्लै पर्नुभएको हुनसक्ने बताए । ‘मेललाई एकातिर, फिमेललाई एकातिर पारेका छौं, अन्तर्राष्ट्रिय मापदण्डअनुसार नै चलेका छौं ।’ उनले भने । उनले आइसोलेसन नै उत्तम वार्डमध्ये एक भएको बताए ।
प्रतिष्ठानको अझैपनि महत्वपूर्ण उपकरण जडान हुन नसकेको विषयमा उनले केही बोलेनन् । अस्पतालमा भेन्टिलेटरसहितको १३ आइसीयू बेड, अल्ट्रासाउन्ड, अत्याधुनिक एक्स–रे, डेफिब्रिलेटर, संक्रमित बच्चाका लागि पेडियाट्रिक आईसीयू, डायलसिस, अप्रेसन थिएटर, हाई डिपेन्डेन्सी युनिट, प्रयोगशाला, गाइनो वार्ड लगायतका उपकरण राखिने भनिएको थियो । हालसम्म माग गरिएका कुनै उपकरण आएका छैनन् ।