धरानः धरान–६ पानबारीमा एउटा राई परिवार छ । घडेरी मात्रै । घर टिनले छाएको, वरिपरी बाँसको भाटाले बारिएको । श्रीमान्–श्रीमतीसँगै । छोरा एकजना छन् तर छोरा पनि खासै काम गर्दैनन्, जाँड–रक्सी सेवन गरेर हिँड्छन् । भोजराज राई दम्पत्तिमध्ये भोजराज क्यान्सर रोगले थलिएका छन् भने श्रीमती आँखा फुलो परेको र आँखा खासै देख्दिनन् । दुवैजना काम गर्न सक्दैनन् । काम गर्ने मान्छे कोही छैनन्, खान छैन, दुवैको उपचार गर्ने खर्च समेत छैन ।
भोजराजको शुरूमा कान छेऊमा सानो कोठी आयो, त्यसपछि उनले खासै वास्ता गरेनन् तर भित्रभित्र पाकेर ८०–८५ वटा किरा भेटेपछि बीपी प्रतिष्ठान पुगे । बीपी प्रतिष्ठान पुगेपछि चिकित्सकले क्यान्सर भएको भन्दै अप्रेसन गरे । आर्थिक समस्याले थलिएका भोजराजलाई पहिलोपटक छोरी–ज्वाइँ र गाउँलेले सहयोग गरेर त्यहाँ अप्रेसन सफल भयो तर हप्तैपिच्छे चेकअप गर्न खर्च अभावले उनीहरू जान सकेका छैनन् ।
‘चिकित्सकले हप्तैपिच्छे अस्पताल आउनु भन्नुभयो तर खर्च अभावले जानै सकिएको छैन ।’ उनले भने । यस्तै, खर्च अभावले नै श्रीमतीको पनि आँखाको उपचार गर्न नसकिएको पीडा सुनाउँछन् भोजराज । ‘एउटा आँखा अलि अलि देख्छु भन्छिन्’, उनले सुनाए, ‘खर्च अभावमै उपचार गर्न सकिनँ ।’ उनीहरूले उपचारका लागि सहयोगको आह्वान गरेका छन् । ‘चिकित्सकले बीपी प्रतिष्ठानमै उपचार हुन्छ भनेका छन्, सहयोग गरिदिए हामी स्वस्थ हुन्थ्यौं र काम गरिखाने थियौं, त्यसैले सबैलाई सहयोगको आग्रह गर्दछौं ।’
लकडाउनको समयमा स्थानीय जनप्रतिनिधि गोमा खनाल (गौतम) को अगुवाईमा गाउँघरमै सहयोग मागेर उपचार गरेको बताइन् । उनकै अगुवाईमा परिवारलाई राहत दिएको छ । केही चामल, दाल, तरकारी दिएको उनले बताइन् । ‘काम नगरी उहाँहरूको हात मुख जोर्ने अवस्था छैन, उपचारको कुरा त परको भयो, अहिले यो लकडाउनको अवधिभरलाई केही राहत दिएका छौं, उनको परिवारलाई खानसम्म पुग्ला, त्यो समयपछि के गर्ने भन्ने चिन्ता बढ्दो छ ।’ उनले भनिन् । उनले उपचारका लागि सबैसँग सहयोगको अपिल पनि गरिन् ।