धरानः धरानस्थित बीपी कोइराला स्वास्थ्य विज्ञान प्रतिष्ठानबाट थप १२ जनाले कोरोना जितेर घर फिरेका छन् ।
झापाका १२ जना कोरोना भाइरस संक्रमित शनिबार घर फिरेका हुन् । प्रवक्ता डा. निदेश सापकोटाले १८ वर्ष उमेरदेखि ५८ वर्षसम्मका १२ जना पुरुष कोरोनालाई जितेर घर फर्किएको जानकारी दिए । पिसीआर परिक्षणमा नेगेटिभ रिपोर्ट आएपछि डिस्चार्ज गरिएको हो । प्रतिष्ठानले हालसम्म १ सय ८३ जना संक्रमितलाई सेवा दिएको छ ।
जसमध्ये ८३ जना कोभिड १९ संक्रमित ब्यक्तिलाई उपचारका लागि प्रतिष्ठानमा भर्ना गरिएको छ । त्यसैगरी ३३ जना सफल उपचारपछि डिस्चार्ज भएको र ६५ जना स्थानान्तरण भएको प्रतिष्ठानले जनाएको छ ।
प्रतिष्ठानका अनुसार शनिबार दुई जना नयाँ संक्रमित उपचारका लागि भर्ना भएको र आरडीटी परिक्षणका क्रममा पोजेटिभ देखिएका एक जना ब्यक्तिलाई पनि प्रतिष्ठानमा राखिएको छ ।
प्रतिष्ठानले हालसम्म ४ सय ७२ वटा शंकास्पद नमूना संकलन गरेको छ । जसमा १४ जनामा संक्रमण देखिएको र ४ सय ५८ जनाको रिपोर्ट नेगेटिभ रहेको छ ।