धरानः कोभिड अस्पताल तत्काल सन्चालन गरलगायतको माग राख्दै नेपाल तरुण दल र स्वतन्त्र विद्यार्थी युनियनले धरानस्थित बीपी कोइराला स्वास्थ्य विज्ञान प्रतिष्ठानको उपकुलपतिको कार्यालयमा ताला लगाएको छन् ।
केही समयअघि प्रा.डा. ज्ञानेन्द्र गिरीको कार्यकक्षमा तालाबन्दी गरेर फर्किएको तरुण दलका नगर सभापति हिमाल श्रेष्ठले जानकारी दिए । ‘यो अनिश्चितकालीन ताला हो’, उनले फोन सम्पर्कमा भने । बीपी प्रतिष्ठानले वैशाख ११ गते अस्पताल सञ्चालनमा ल्याउने भन्दै आलटाल गरिरहेको र हाल धरानका बिरामीलाई समस्या परेको उनले बताए ।
महेन्द्र बहुमुखी क्याम्पस स्वतन्त्र विद्यार्थी युनियनका सचिव दोर्ची शेर्पाले धरानेका लागि छुट्टै बेड छुट्याउन माग गरेको जानकारी दिए । उनीहरूले प्रतिष्ठानको सिनेट बैठक रोकिनुपर्ने पनि माग राखेका छन् ।
यसअघि धरानका उपमेयर तिलक राईले धरान उपमहानगरभित्र कोरोना संक्रमण समुदायस्तरमा फैलिएको बेला सिनेट बैठक बोलाएको भन्दै स्वास्थ्यमन्त्रीलाई पत्र लेख्दै रोक्न माग गरिसकेका छन् । बैठक साउन ३० गते डाकिएको छ । प्रतिष्ठानको सिनेट सदस्य समेत रहेका उनले कोभिड अस्पताल उद्घाटन भएता पनि हाल सम्म सञ्चालनमा नआएको गुनासो पत्रमा गरेका छन् ।