धरानः अन्ततः धरानस्थित बीपी कोइराला स्वास्थ्य विज्ञान प्रतिष्ठानस्थित उपकुलपति कार्यालयमा लगाइएको ताला घण्टा बढी टिकेन ।
इलाका प्रहरी कार्यालय धरानको प्रहरी टोली पुगेर ताला फोडेको छ । नेविसंघ र तरुण दल मिलेर लगाइएको ताला एकघण्टापछि फोडिएको हो । कोरोना अस्पताल स्थापना भएको ३ महिनासम्म पनि सञ्चालनमा नआएको, धरानका कोरोना संक्रमितलाई उपचारका लागि भर्ना नगरिएको आदि माग राखेर ताला लगाइएको तरुण दलका नगर सभापति हिमाल श्रेष्ठले जानकारी दिए । आन्दोलनकारीहरुले तत्काल प्रतिष्ठानमा कोभिड अस्पताल सञ्चालन गर्न र भर्ना हुनबाट बञ्चित नगर्न माग गरेको जनाएका छन् । उनीहरूले प्रा.डा. ज्ञानेन्द्र गिरीको कार्यकक्षमा तालाबन्दी गरेर फर्किएका हुन् । बीपी प्रतिष्ठानले वैशाख ११ गते अस्पताल सञ्चालनमा ल्याएको थियो ।
यसअघि धरानका उपमेयर तिलक राईले धरान उपमहानगरभित्र कोरोना संक्रमण समुदायस्तरमा फैलिएको बेला सिनेट बैठक बोलाएको भन्दै स्वास्थ्यमन्त्रीलाई पत्र लेख्दै रोक्न माग गरिसकेका छन् । बैठक साउन ३० गते डाकिएको छ । प्रतिष्ठानको सिनेट सदस्य समेत रहेका उनले कोभिड अस्पताल उद्घाटन भएतापनि हालसम्म सञ्चालनमा नआएको गुनासो गर्दै आएका छन् ।