धरानः धरानलगायत प्रदेश १ का अधिकांश ठाउँमा कोरोना संक्रमण बढिरहेको बेला बीपीका पदाधिकारी र विशेषज्ञ चिकित्सक काठमाडौं पुगेका छन् ।
‘ओपीडी’ सेवा बन्द गरेर चिकित्सकहरू काठमाडौं पुगेको भन्दै अहिले आलोचना समेत शुरू भएको छ । आलोचना त आफ्नो ठाउँमा छ तर हजारौं बिरामी उपचार सेवाबाट बञ्चित भएका छन् । साउन ३० गतेको सिनेट बैठक भ्याउनकै लागि प्रतिष्ठानको ओपिडी सेवा बन्द गरेर प्रतिष्ठानका पदाधिकारी र चिकित्सक काठमाडौं पुगेको आरोप पनि लाग्न थालेको छ ।
प्रतिष्ठानका पदाधिकारीहरु उपकुलपति डा. ज्ञानेन्द्र गिरीसहित शिक्षाध्यक्ष डा गुरु खनाल, रजिष्ट्रार डा मोहनचन्द्र रेग्मी र निर्देशक गौरीशंकर साहलगायतका डेढ दर्जन चिकित्सक काठमाडौं पुगिसकेका छन् । कोरोना संक्रमित र अन्य बिरामीको उपचार गर्न छाडेर जानु गैरजिम्मेवारीपन देखाएको धरान उपमहानगरपालिकाका मेयर तिलक राईले बताएका छन् । उनले यसअघि नै स्वास्थ्यमन्त्री भानुभक्त ढकाललाई लिखित आग्रह गरेका थिए तर अटेर गरिएको उनको भनाइ छ ।
तालाबन्दी गर्न पुगेकामाथि प्रहरीको अवरोध
यसैबीच बुधबार उपकुलपतिको कार्यकक्षमा तालाबन्दी गर्न गएका नेपाली कांग्रेसका कार्यकर्ता र प्रहरीबीच केहीबेर तनाव भएको छ । नेवि संघ, तरुण दल र महिला संघका कार्यकर्ता उपकुलपतिको कार्यालयमा ताला लगाउन पुगेका थिए । उनीहरूको प्रहरीसँग घम्साघम्सी समेत परेको छ । प्रहरीले छेकेपछि तालाबन्दी भने भएन । अहिले पनि त्यो ताला नेविसंघ, तरुण दलकै हातमा छ ।
तरुण दलका धरान नगर अध्यक्ष हिमाल श्रेष्ठले प्रहरीले अवरोध गरेपछि ताला नलगाइएको बताए । उनले चार महिनाअघि सञ्चालनमा आउने भनिएको कोभिड १९ अस्पताल सञ्चालन हुनुपर्ने माग पनि राखेको बताए ।
अघिल्लो दिन अर्थात् मंगलबार उनीहरूले कार्यकक्षमा तालाबन्दी गरेका थिए । तालाबन्दी गरेको एक घण्टा पछि प्रहरीले ताला फोडेको थियो । ताला फोडेपछि आज (बुधबार) उनीहरू फेरि ताला लगाउन पुगेका थिए ।
प्रहरी अवरोधको कारण ताला लगाउन नपाएपनि उनीहरूले कोणसभा भने गरेका थिए । माग गरिएका विषयहरूमा गैर जिम्मेवारी, ढिलासुस्ती र मनोमानी गरिए आन्दोलन कडा हुने र आन्दोलन जारी रहने अध्यक्ष श्रेष्ठले बताए ।