धरानः झुक्याएर सुनका गरगहना ठगी गरेको आरोपमा एक महिलालाई प्रहरीले पक्राउ गरेको छ ।
पक्राउ पर्नेमा झापाको शान्तिनगर–६ घर भई काठमाडौं नयाँबानेश्वर बस्ने २९ वर्षीया शारदा मगर छिन् । मगरले सिन्धुपाल्चोक घर भई नयाँबानेश्वर बस्ने रमिता रन्जित श्रेष्ठको गरगहना झुक्याएर ठगी गरेको आरोप लागेको छ । मगरले श्रेष्ठको ४ लाख ३६ हजार रुपैयाँ बराबरको गरगहना ठगी गरेको उजुरी परेपछि उनलाई पक्राउ गरिएको महाशाखाले जारी गरेको विज्ञप्तिमा उल्लेख छ ।
पक्राउ परेकी उनलाई कारबाहीका लागि महानगरीय प्रहरी परिसर टेकु पठाइएको महाशाखाले जनाएको छ । सुन पसलबाट विभिन्न बहानामा झण्डै साढे चार लाखका गरगहना ठगी गर्ने एक महिलालाई प्रहरीले पक्राउ गरेको छ ।
प्रहरीका अनुसार मगरले चार लाख ३६ हजार रकम बराबरको सुनका गरगहनाहरु विभिन्न बहाना बनाई झुक्याई ठगी गरेकी थिइन् । उनले ठगी गरेका गहनाहरुमा सुनको सिक्री डेढ तोला थान १, सुनको लकेट ५४ लालको थान १, सुनको ब्रासलेट १ तोला ५२ लालको थान १, हिराको औंठी थान १, र सुनको औंठी ३५ लालको थान १ रहेका छन् ।
अपराध अनुसन्धान महाशाखाबाट खटिएको प्रहरी टोलीले मगरलाई ज्ञानेश्वरबाट पकाउ गरेको जनाइएको छ । साथै निजले अन्य व्यक्तिहरु समेतलाई ठगी गरेको हुन सक्ने सम्भावना रहेको भन्दै प्रहरीले ठगीमा परेको भए कार्यालयमा सम्पर्क गर्न आग्रह गरिएको छ ।