धरानः धरानमा आज (शुक्रबार) थप २ जनामा कोरोना संक्रमण पुष्टि भएको छ । योसँगै समुदायमा कोरोना संक्रमित हुनेहरूको संख्या २९ पुगेको धरान उपमहानगरपालिकाका स्वास्थ्य महाशाखा प्रमुख उमेश मेहेताले जानकारी दिए । आज शुक्रबार संक्रमित हुने इटहरी-८ ठेगाना लेखाएका ३० वर्षीय पुरुष हालसम्म सम्पर्कविहीन रहेको पाइएको छ ।
यस्तै, धरान-१९ की ३३ वर्षीया महिला सम्पर्कमा नै रहेको उनले जानकारी दिए । उनी भारतीय सेनाकी श्रीमती रहेको उनले जानकारी दिए । उनका श्रीमान अहिले पनि बीपीको आइसोलेसन वार्डमा उपचारत छन् । उनको केहीदिनअघि पोजेटिभ रिपोर्ट आएको थियो । जसको रिपोर्ट पुनः परीक्षण पोजेटिभ आएको हो ।
केही महिनाअघि भारतबाट फर्किएका उनी धरान-१७ एन्फास्थित क्वारेन्टाइनमा बस्दै आएका थिए । ३४ वर्षीय उनमा त्यतिबेला परीक्षण गर्दा नेगेटिभ रिपोर्ट आएको थियो । ‘त्यतिबेला परीक्षण गर्दा नेगेटिभ रिपोर्ट आएको थियो’, स्वास्थ्य महाशाखाका प्रमुख उमेश मेहताले भने, ‘अनि उहाँ घर फर्किनुभएको थियो ।’
घरमा बसिरहेका उनका साथीहरू भने एन्फामै थिए । एन्फामा रहेक साथीको भोलिपल्ट पोजेटिभ रिपोर्ट आयो । फेरि शंका लागेर फेरि परीक्षण गर्दा उनमा पोजेटिभ रिपोर्ट आएको प्रमुख मेहता बताउँछन् । ‘साथीहरूको रिपोर्ट आएपछि पुनः परीक्षण गराउँदा पोजेटिभ रिपोर्ट आएको हो’, उनले भने, ‘धरान–१३ का दुईजनामा पनि यस्तै पुनः जाँच गराउँदा कोरोना पोजेटिभ रिपोर्ट आएको थियो ।’