धरानः धरानस्थित चारकोशे झाडीमा निगुँरो टिप्न गएकी एक महिलामाथि यौन दुव्र्यवहार गर्ने युवालाई प्रहरीले सार्वजनिक गरेको छ ।
यौन दुव्र्यवहारको आरोपमा ३३ वर्षीय तेजकुमार धामीलाई इलाका प्रहरी कार्यालय धरानले पक्राउ गरेर सार्वजनिक गरेको हो । ५२ वर्षीया ती महिलालाई उनले धारिलो हतियार खुकुरी देखाई जबरजस्ती करणी गर्न खोजेको इलाका प्रहरी कार्यालय धरानका डिएसपी ज्ञानेन्द्र बस्नेतले जानकारी दिए ।
पीडितले कानमा लगाएको सुनको कुन्डल र नाकमा लगाएको सुनको फुली लुछी चोरी गरी भागी फरार भएको भनी पीडितले दिएको सूचनाको आधारमा तत्कालै पक्राउ गरिएको उनले जानकारी दिए । निजको घरबाटै नियन्त्रणमा लिई पीडित र निज धामीको शारीरिक परीक्षणको कार्य सम्पन्न गरी जबरजस्ती करणी उद्योग तथा चोरी मुद्दामा अनुसन्धान भइरहेको उनले बताए ।
महिलाकी छोरीको भनाइअनुसार आमा-छोरी जंगल गइरहेको बेला ती युवाले छोरी अलिक अगाडि गएपछि महिलामाथि दुव्र्यवहार गरेका हुन् । ‘आमा र म जंगल जाँदै थियौं, म अगाडि थिएँ, आमा अलिक पछाडि हुनुहुन्थ्यो, उसले आमालाई घारीमा लडाएर जबरजस्ती गर्दै रहेछ । आमा कराएपछि म फर्केर आउँदा भागिहाल्यो ।’ पीडित महिलाकी छोरीले भनेकी छिन् ।