बिर्तामोडः धुलाबारीमा पाँच तारे होटल होटल मेची क्राउन सञ्चालनमा आएको छ । बुधबारदेखि होटलको सफ्ट ओपनिङ गरिएको हो ।
व्यवसायी पवित्रकुमार कार्की, बलराम सापकोटा, मेरीगोल्ड ज्वेलरीका संचालक सुरेशमान श्रेष्ठ र निर्माण सामाग्री उद्योगमा लगानी गरिरहेको क्षमादेवी बिल्डर्स समूहको लगानी छ । आठ विघा जग्गामा रहेको होटलमा डेढ अर्ब लगानी छ । होटलको व्यवस्थापन द पिक हस्पिटालिटीले गरेको छ । उनले क्यासिनोको अनुमति पाउनेबित्तिकै होटल पूर्ण रूपमा संचालनमा आउनेछ ।
उनले भ्रमण वर्षलाई लक्षित गरेर होटल संचालनमा ल्याएको बताउँदै कोभिड लामो समयसम्म नरहने हुनाले समस्या नपर्ने जिकिर गरे। यो होटल भारतीय पर्यटकलाई लक्षित गरेर निर्माण गरिएको हो ।
भारतको बागडोग्रा विमानस्थलबाट २५ किलोमिटर दूरीमा होटल छ । भारतबाट आउने पर्यटकलाई क्यासिनोमा आकर्षित गर्ने उद्देश्यले होटल निर्माण गरिएको हो । यो होटल भद्रपुर विमानस्थलबाट जम्मा १७ किलोमिटर दूरीमा छ । होटलमा निजी हेलिप्याड राख्ने ठाउँ पनि छ । त्यो बाहेक पाँच सयभन्दा बढी सवारी साधन पार्किङ गर्ने सुविधा छ । होटलमा १ सय ५ कोठा छ । पाँच वटा मेची सुइट्स, १० वटा एक्जुकेटिभ भिल्ला, १९ मेची क्लब रुम र ७१ वटा डिलक्स रुम छ ।
विवाह, बैठक, सम्मेलन, सेमिनार आदिका लागि पनि यस होटलमा सुविधा सम्पन्न हलहरु रहेको उनले बताए। होटलमा दुई वटा रेष्टुरेन्ट छन् ।