धरानः धरान–१६ स्थित पञ्चायत आधारभूत विद्यालय (भकारी स्कुल) का विद्यार्थीले स्कुल ब्याग पाएपछि दङ्ग परेका छन् ।
१०५ जना विद्यार्थीलाई स्कुल ब्यागसहित कलर बाकस, पेन्सिल, कापीलगायतका शैक्षिक सामग्री प्रदान गरिएको थियो । चाइना फाउन्डेसन फर पोभर्टी एवम् राष्ट्रिय अपाङ्गता पुस्थापना समाज अनामनगरले सो शैक्षिक सामग्री प्रदान गरेको हो ।
विद्यालय ब्यवस्थापन समिति अध्यक्ष जनार्दन वस्तीको अध्यक्षतामा सम्पन्न कार्यक्रममा प्रमुख अतिथि सांसद जयकुमार राई रहेका थिए । विद्यालयका प्रधानाध्यापक कृष्णप्रसाद भट्टराई, सांसद राई, फाउन्डेशनका प्रतिनिधि कृष्णप्रसाद ढकालले विद्यार्थीलाई शैक्षिक सामग्री हस्तान्तरण गरेका थिए ।
शिक्षालाई संविधानमै मौलिक हकको रुपमा उल्लेख भएको हुँदा विस्तारै कार्यान्वयन हुँदै जाने र विद्यालयलाई सुन्दर फूलबारीको रुपमा विकास गर्ने कार्यमा आफू सदैव सक्रिय रहने सांसद राईको धारणा थियो ।