धरानः धरान–१९ स्थित हरियाली सामुदायिक वनको पारिलो घामसँगै रमाउने र पिकनिक खाने अहिले बढेका छन् ।
उहिल्यै ‘वनभात’ भन्दै जाने चलन थियो भने अहिले पिकनिक । यही पिकनिकले अहिले बजार पिटेको छ । हिउँदलाई घुमघामको याम पनि भनिन्छ । त्यसैले भनौं ‘हिउँदको घाम पिकनिक खाने याम’ बनिरहेको छ ।
धरानका अधिकांश सामुदायिक वनले अहिले स्थानीय र बाह्य पर्यटकले कमाइरहेका छन् । यसैबीच हरियालीमा भने अहिले दिनहुँ पर्यटक तथा पिकनिक खान आउने बढेको वन समूहका अध्यक्ष रामकुमार राईले जानकारी दिए । ‘अन्य बार अलि कम आउँछन्, शनिबार त १५ वटासम्म ग्रुप आउन थालेका छन्’, अध्यक्ष राईले भने । उनले २५ रुपैयाँ र ग्रुपमा आए ९ सय रुपैयाँ टिकट दर राखिएको जानकारी दिए ।
विशेषगरी बालबालिका र युवायुवती पिकनिकमा बढी रमाउँछन्, युवायुवती बढी जोशमा हुन्छन् । अहिले धरानलगायत पूर्वका विभिन्न ठाउँमा घुमफिर गर्ने वा पिकनिकमा रमाउने बढेका छन् । अहिले पिकनिकको सिजन शुरू नै भएको र पिकनिकमा रमाउने बढेको त्यहाँस्थित व्यवसायी बताउँछन् । ‘अहिले पिकनिक जाने संस्कृतिको विकासले पनि पर्यटक बढ्न थालेका हुन्’, उनले थपे, ‘पिकनिकस्थलमा पुगेर नाचगान गर्दै रमाउन थालेका छन्, यहाँ प्रशस्त ठाउँ पनि छ, साथै बालबालिकाका लागि खेल्ने ठाउँ, चराचुरुङ्गी र वन्यजन्तु अवलोकन आदि पनि सुविधा छ ।’
पिकनीकमा विशेषतः युवायुवती, विद्यार्थी, कर्मचारी, व्यवसायी, परिवार बढी रमाउने गर्दछन् । पिकनिकको सबैभन्दा रमाइलो पक्ष नाचगान र खानपिन नै हो । त्यहाँ बज्ने गीतको तालमा जान्ने त जान्ने भइगए नजान्ने समेत कम्मर हल्लाउन पछि पर्दैनन् ।
धरान आसपास धेरै पिकनिक स्पट छन् । हरियाली सामुदायिक वन क्षेत्र, सप्तरंगी पार्क, भेडेटार, नाम्जे उत्कृष्ट गन्तव्य हुन् । पर्यटकीयस्थलका रूपमा परिचित भेडेटारमा पिकनिक ‘स्पट’ नै निर्माण भएको छ ।
झापाको माइधार, इलामको कन्याम, धनकुटाको तमोर किनार, झापाको जामुनखाडी, सुनसरीको बर्जुताल, तालतलैया, तरहरा पश्चिम, बेलबारीको बेतना सिमसार आदि पिकनिकका लागि चर्चित गन्तव्य हुन् ।
तस्वीरः हाम्रो कोशी आवाज