धरानः संखुवासभा जिल्लाको उत्तरी क्षेत्र भोटखोलामा कर्मा-ज्यामु भोटिया फाउन्डेसनले ५६ लाख बराबरको धुवाँरहित चुल्हो वितरण गरेको छ ।
संखुवासभा जिल्ला शिङ्सा क्षेत्र घर भई हाल अमेरिकामा बस्दै आएका कर्मातेन्जिङ भोटिया र ज्यामु भोटिया दम्पत्तिको नाममा स्थापना गरिएको फाउन्डेसनले १ सय ५० थान धुवाँरहित चुल्हो वितरण गरिएको अरुणोदय माविका प्रधानाध्यापक छिरिङ तेम्बा लामाले जानकारी दिए । फाउन्डेसनबाट आएका फाउन्डेसनका उपाध्यक्ष छिरिङ पासाङ भोटेको अगुवाईमा शिङ्सा क्षेत्र भोटखोलाको तीन वटा गाउँमा सो चुल्हो वितरण गरिएको जनाएको छ ।
भोटखोला गाउँपालिकाको वडा नम्बर दुईको लिङम, गुम्बा र च्याम्ताङ (दम्दाङ) गाउँका १५० घर परिवारको लागि चुल्हो वितरण गरिएको हो । धुँवारहित सो चुल्हो ढुवानीसहित त्यस क्षेत्रमा पुग्दा प्रति चुल्हो ३६ हजार रुपैयाँ पर्ने प्रधानाध्यापक छिरिङ तेम्बा लामाले बताउँछन् । १५० वटा चुल्होको कुल मूल्य करिब ५४ लाख पर्न जाने बताए ।
शिङ्सा क्षेत्र भोटखोला संखुवासभा जिल्लाको विकट दुर्गम क्षेत्रमा पर्दछ । त्यहाँ दाउराबाट नै इन्धनको रुपमा प्रयोग हुँदै आएको छ तर सिधै दाउरा बाल्दा स्वास्थ्यमा असर पर्ने भएकोले यो चुल्हो स्वास्थ्यको लागि उपयोगी मानिएको छ ।
पछिल्लो समयमा भने यस क्षेत्रमा कोशी राजमार्गअन्तर्गत किमाथाङ्का–खाँदबारी सडक खण्डको ट्रयाक खोलिएको छ । हाल सो ट्रयाक भोटखोला–२ च्याम्ताङमा शंखभीरमा पुगेर रोकिएको छ । किमाथाङ्का नाका जोड्न करिब १४ किलोमिटर ट्रयाक खोल्न बाँकी छ । जसले गर्दा ढुवानीमा धेरै सहज भएको छ ।
सामाजिक सेवामा रहेका कर्मा–ज्यामु दम्पत्तिले च्याम्ताङ (दम्दाङ) गाउँको लागि अरुणोदय आधारभूत भवन निर्माण गरिदिएका छन् । त्यसैगरी अरुणोदय लिङम माविमा कर्मा– ज्यामु पुस्तकालय स्थापना गरिएको छ । दम्पत्तिले स्थानीय हाइड्रोपावर, शिक्षालगायत विभिन्न विकास निर्माणका लागि आर्थिक, भौतिक सहयोग गर्दै आइरहेका छन् ।