धरानः सुनसरीको इनरुवा नगरपालिकाले कोरोना भाइरस (कोभिड–१९) को जोखिमका कारण विभिन्न क्षेत्र बन्द गर्ने निर्णय गरेको छ । नगरप्रमुख राजन मेहताले सार्वजनिक सूचनामार्फत् विद्यालय तथा सभा समारोह बन्द गर्न भनेका हुन् ।
सुनसरी जिल्लाका सरोकारवालाहरुको छलफलबाट निष्कर्ष निकालेर विद्यालय बन्द गराउने निर्णय गरेको प्रमुख मेहताले सूचनामा उल्लेख गरेका छन् । कोरोना संक्रमणको जोखिम निकै बढेकाले विद्यालय बन्द गर्नुपरेको उनले उल्लेख गरेका छन् ।
विद्यालयसँगै नगरपालिकाले सभा समारोह, सम्मेलन, मेला तथा जात्राहरुमा पनि बन्देज लगाएको छ ।
उता विराटनगर महानगरपालिकाले एक साताको लागि विद्यालय बन्द गर्ने निर्णय गरेको छ ।
मेयर भीम पराजुलीका अनुसार बैठकले निर्णय गर्दै तत्काललाई एक साताका लागि महानगरभित्रका विद्यालय बन्द गर्ने निर्णय गरेको जानकारी दिए । स्वास्थ्यमन्त्रालयको कोरोना संवेदनशील जिल्लाको सूचीमा मोरङ पनि छ ।