विराटनगरः परीक्षा हुनु पहिले नै प्रश्नपत्र बाहिर ल्याएको भन्दै प्रहरीले १० जनालाई पक्राउ गरेको छ ।
इन्जिनियरिङ संकायतर्फको बीई दोस्रो सेमिस्टारको फिजिक्स विषयको मूल प्रश्नपत्र परीक्षा पहिले नै बाहिरिएको थियो । अनुसन्धानका क्रममा फोटोकपी गर्ने कर्मचारीले सामाजिक सञ्जालमार्फत् प्रश्नपत्र बाहिर ल्याएको पाइएको मोरङ प्रहरीले जनाएको छ ।
पक्राउ पर्नेमा मोरङको विराटनगर महानगरपालिका ४४ वर्षीय कोमलप्रसाद गौतम, संखुवासभाको मादी गाउँपालिका ६ का ३५ वर्षीय गोपाल कार्की, रुपन्देही तिलोचन नगरपालिका १२ का ३० वर्षीय विजय पोखरेल, गोर्खा भिमसेन थापा गाउँपालिका १ का ३२ वर्षीय मिनप्रसाद भट्ट र गोर्खा गण्डकी गाउँपालिका ३ का ३१ वर्षीय भरत पाठक रहेका छन् ।
यस्तै, गोर्खाकै गोर्खा नगरपालिका–४ का २६ वर्षीय विकास खड्का, सिन्धुपाल्चोक बाह्रबिसे नगरपालिका ४ का २८ वर्षीय निर्मल खड्का, महोत्तरी रामगोपालपुर नगरपालिका ९ का २९ वर्षीय नानिपथ मण्डल, सप्तरी वोदेवरसाइन नगरपालिका ७ का २९ वर्षीय जीवनकुमार यादव र सप्तरीको अग्नीसायर कृष्णसवरण गाउँपालिका ५ घर भई भक्तपुरको लोकन्थली बस्ने २६ वर्षीय महेश यादव रहेका छन् । उनीहरुमाथि थप अनुसन्धान भइरहेको जिल्ला प्रहरी कार्यालय मोरङका प्रवक्ता डीएसपी मन्जिल मुकारुङले बताए ।
गत वैशाख ३ गते पूर्वाञ्चल विश्व विद्यालय गोठगाउँ मोरङमा हुन लागेको परीक्षाको प्रश्नपत्र पहिले नै बाहिरिएपछि विश्व विद्यालयले प्रहरीले अनुसन्धानका लागि आग्रह गरेको थियो ।