धरान: मोरङको सुन्दरहरैंचा-५ तीनपैनीस्थित भित्री सडक खण्डमा सिटी सफारी दुर्घटना हुँदा सिटीमा सवार बालिकाको मृत्यु भएको छ ।
मङ्गलबार बिहान साढे ९ बजे को१ह ७५५८ नम्बरको सिटी सफारी आफै अनियन्त्रित भई दुर्घटना हुँदा सफारीमा सवार रहेकी सोही स्थान बस्ने रुद्र खड्काको छोरी ५ वर्षीय बालिका रविना खड्का घाइते भएकी थिइन् । घाइते बालिकाको धरान घोपामा उपचारको क्रममा दिउँसो ११ बजे मृत्यु भएको छ । सिटी सफारी र चालक सोही स्थानका हरि नारायण चौधरी प्रहरी चौकी गछियाको नियन्त्रणमा रहेको जिल्ला प्रहरी कार्यालय मोरङका प्रहरी उपरीक्षक महेन्द्रकुमार श्रेष्ठले जानकारी दिए ।
यस्तै, भोजपुर पौवादुम्माङ–१ अरुणडाँडाका ३० वर्षीय निमा दावा शेर्पाको करेन्ट लागेर मृत्यु भएको छ । मङ्गलबार बिहान साढे १० बजे बिजुलीको लाइन बिग्रिएकोले उनि साथीहरुसँग आफ्नै घर छेऊमा रहेको ट्रान्समिटरमा भरयाङ लगाई चढ्ने क्रममा करेन्ट लागेर अन्दाजी २५ फिट माथिबाट खस्दा घटनास्थलमा नै मृत्यु भएको छ । घटनाको बारेमा जानकारी पाउनासाथ इलाका प्रहरी कार्यालय तिवारीभंज्याङबाट टोली खटी गई थप अनुसन्धान गरिरहेको छ ।