धरानः धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि एकजना बिरामी कुरुवा बेपत्ता भएका छन् ।
काकाको छोराको उपचारका लागि प्रतिष्ठान आइपुगेका उनी बुधबारदेखि नै बेपत्ता भएको आफन्तले बताएका छन् । वर्ष ४३ को गणेशकुमार राई बेपत्ता बनेको आफन्त बिना राईले जानकारी दिइन् । उनी अन्य आफन्तसँगै प्रतिष्ठान आएका थिए । भोजपुरबाट रेफर भएका बिरामीको उपचारका लागि भन्दै उनी यहाँ आएको पाइएको बेपत्ता बनेको इलाका प्रहरी कार्यालय धरानका प्रहरी निरीक्षक हेमराज ओलीले जानकारी दिए । ‘आफन्तले मानिस हराएको भन्दै निवेदन समेत दिएको पाइएको छ’, उनले भने, ‘हामी खोजीमा लागिरहेका छौं ।’
आफन्त बिनाका अनुसार उनी र प्रतिष्ठानका चिकित्सकसँग केही भनाभन समेत भएको पाइएको छ । ‘चिकित्सकसँग केही भनाभन भएको थियो भन्ने जानकारी पाइयो’, उनले भनिन्, ‘त्यसपछि त्यहाँका सुरक्षा गार्डले सम्झाएपछि उनी बाहिर निस्किएको र एकाएक बेपत्ता भएका थिए ।’ इमरजेन्सीमा उपचाररत आफन्तसँग अन्य आफन्त पनि आएका थिए । बुधबार ३ः०० बजेदेखि बेपत्ता उनको मोबाइल पनि स्वीचअफ रहेको आफन्तले बताएका छन् ।
‘मोबाइल नै स्वीचअफ छ, सोधीखोजी गर्ने ठाउँतिर पनि सबैतिर सोधीखोजी गरिसक्यौं, त्यही भएर प्रहरीमा पनि मानिस हराएको भनेर निवेदन दिइसकेका छौं’, आफन्त प्रजला राईले भनिन् । कोही कसैले फेला पार्नुभएमा ९८१८८८७५४२ मा सम्पर्क गरिदिन हुन अनुरोध गरिएको छ ।