उदयपुरः उदयपुर ताप्ली–४ पोखरीस्थितको कच्ची सडकमा बोलेरो खस्दा एकजनाको मृत्यु भएको छ ।
शनिबार बेलुका साढे ७ बजे लहानबाट लखनडाँडातर्फ मिलको मेशिन बोकेर जाँदै गरेको बा१८च १५६७ नम्बरको बोलेरो गाडी आफै अनियन्त्रित भई सडकबाट अन्दाजी २०० मिटर तल खस्दा बोलेरोमा सवार चारजनामध्ये एकजनाको घटनास्थलमै मृत्यु भएको छ भने तीनजना घाइते भएको १ नं. प्रदेश कार्यालय विराटनगरका सूचना अधिकृत प्रहरी उपरीक्षक महेन्द्र कुमार श्रेष्ठले जानकारी दिए ।
मृत्यु हुनेमा सिन्धुली दुधौली–१० का ६० बर्षीय इन्द्रबहादुर विक रहेका छन् । सो दुर्घटनामा उदयपुर कटारी नगरपालिका १० का बोलेरो चालक ३५ वर्षीय डाँक नारायण श्रेष्ठ, उदयपुर ताप्ली–४ ठानागाँउ ज्यामिरेका ३० वर्षीय झगरबहादुर सार्की र सोही स्थानका २६ वर्षीय डम्वरबहादुर तामाङ घाइते भएका छन् ।
घटनाको जानकारी पाएलगतै प्रहरी चौकी रुपाटार र रामपुर झिल्केबाट प्रहरी टोली खटि गई घाइतेहरु मध्ये श्रेष्ठ र सार्कीलाई उपचारको लागि नोवेल अस्पताल विराटनगर पठाएको छ भने अर्का घाइते तामाङ सामान्य हातखुट्टामा चोट लागेकोले सामान्य उपचारपश्चात् घर पठाइएको छ । इलाका प्रहरी कार्यालय कटारीका अनुसार दुर्घटनामा परी मृत्यु भएका विकको बारेमा कानुनी प्रक्रिया पूरा गरिएको छ ।