धरानः अन्ततः धरानलगायत सुनसरीमा एक साताको लागि निषेधाज्ञा लम्ब्याइएको छ ।
असार १ गतेदेखि ७ गतेसम्मको लागि निषेधाज्ञाको समय बढाइएको सहायक प्रमुख जिल्ला अधिकारी तथा सूचना अधिकृत महेशकुमार पोखरेलले जानकारी दिए ।
सुनसरीका प्रमुख जिल्ला अधिकारी उमेशकुमार ढकालको अध्यक्षतामा बसेको बैठकले सो निर्णय गरेको उनले जानकारी दिए । उनका अनुसार यो समयमा खाद्यान्न, दुध, डेरी, पुस्तक पसल, माछा मासु तथा फलफूल, तरकारीको पसलहरु बिहान ५ बजेदेखि ११ बजेसम्म मात्र खोल्न पाइनेछ । यसअघि जेठ ३१ गतेसम्म निषेधाज्ञा थपिएको थियो ।
उनका अनुसार निषेधाज्ञा ७ गतेसम्म बढाइएको र खाद्यान्न, दूधलगायतका पसल खोल्ने समय परिवर्तन गरेबाहेक विगतका अन्य कुनै पनि निर्णयहरु परिवर्तन भएको छैन । कुनै पसल बिहान, कुनै पसल दिउँसो र साँझ खोल्दा धेरे चहल पहल हुने र अन्योल पनि भएको हुनाले एकै समयमा सबैलाई खोल्न दिने निर्णय गरिएको सहायक प्रजिअ पोखरेलले जानकारी दिए । उनका अनुसार निर्माण कार्यको लागि लागि ट्रक, ट्याक्टरहरुलाई निर्वाधरुपमा हिँडडुल गर्न दिने निर्णय भएको छ भने किसानको तरकारी बारीमा कुहिएर नष्ट हुन नदिन तरकारी संकलन र ढुवानीलाई पनि छुट दिइएको छ ।