धरानः सुनसरीमा भएको दुर्घटनामा तीनजनाको मृत्यु भएको छ ।
सुनसरीको कोशी गाउँपालिका-८ मा सो दुर्घटना भएको हो ।
प्रदेश नं. १ ट्राफिक प्रहरी कार्यालयका इटहरीका डीएसपी सुमन तिम्सिनाका अनुसार आइतबार बिहान ७ः४५ बजे सो दुर्घटना भएको हो । दुर्घटनामा तीनजनाको मृत्यु भएको उनले जानकारी दिए । कोशी गाउँपालिका-८ नङ्खु टोलस्थित पूर्व-पश्चिम राजमार्गमा हायस (माइक्रोबस) ले पिकअप भ्यान र मोटरसाइकल ठक्कर दिएको थियो । हायसले शुरुमा मोटरसाइकललाई ठक्कर दिएको थियो । मोटरसाइकल उछिट्टिएर सडकबाट तल झरेको थियो । त्यसपछि हायसले पुनः पश्चिमबाट पूर्वतर्फ आइरहेको म्याजिकलाई पनि ठक्कर दिएको डिएसपी कार्कीले बताए । तीब्र गतिमा सवारी चलाइएको कारण दुर्घटना भएको हुनसक्ने प्रहरीले जनाएको छ ।
पूर्वबाट पश्चिततर्फ गइरहेको बा३ख् ७२२४ नम्बरको हायसले पश्चिमबाट पूर्वतर्फ आउँदै गरेको स१च४६६१ नम्बरको मोटरसाइकललाई ठक्कर दिएको थियो । यस्तै, मोटरसाइकललाई ठक्कर दिएर हुइँकिएको हायसले पश्चिमबाट पूर्व आउँदै गरेको बा३ख ९३३८ नम्बरको पिकअप भ्यानलाई ठक्कर दिँदा तीनजनाको मृत्यु भएको हो ।
मृत्यु हुनेमा विराटनगर-७ निवासी ४० वर्षीय अक्षयकुमार गुप्ता, विराटनगर-९ का ४५ वर्षीय रामप्रसाद शाहको मृत्यु भएको छ भने मोटरसाइकल चालक सप्तरी डाक्नेश्वरी नगरपालिका-५ का २८ वर्षीय उदय शाहको मृत्यु भएको जिल्ला प्रहरी कार्यालय सुनसरीका सूचना अधिकृत नरेन्द्र कार्कीले जानकारी दिए । दुर्घटनामा गम्भीर घाइते तीनै जनाको जिल्ला अस्पताल इनरुवामा उपचारका क्रममा मृत्यु भएको हो । मोटरसाइकल चालक उदय, मोटरसाइकल पछाडि सवार रामप्रसाद साह र पिकअप भ्यानका चालक अक्षयकुमारको मृत्यु भएको हो । दुर्घटनामा दुई जना घाइते भएका छन् । हायस चालक नुवाकोट विदुर नगरपालिका– १३ का ३५ वर्षीय विवश तामाङ र सहचालक सोही नगरपालिका– ११ का २५ वर्षीय नारायण बस्याल पनि घाइते भएका छन् । घाइतेको उपचार इनरुवा अस्पतालमा भइरहेको छ ।