दमकः झापाको दमकबाट लागूऔषध ब्राउन सुगरसहित चारजनालाई पक्राउ गरिएको छ । सोमबार दिउँसो सवा ३ बजे दमक–६ थाना रोडस्थितबाट इलाका प्रहरी कार्यालय दमकबाट खटिएको प्रहरी टोलीले चेकजाँच गर्ने क्रममा गौरादह–५ बालुवथान का २६ वर्षीय बिवेक लिम्बू र २२ वर्षीय सौरभ राईको साथबाट लागूऔषध ब्राउनसुगर २ ग्राम फेला परेको थियो ।
प्रहरीले थप अनुसन्धान गर्ने क्रममा उनीहरुले खरिद गरी ल्याएको स्थान खुल्न आएसँगै इलाम चुलाचुली–४ घर भई हाल दमक–५ मा बस्ने ३१ वर्षीय विक्रम राई र ३७ वर्षीय जेम्स भन्ने खगेन्द्र साँवाको कोठाबाट पाँच लाख चौध हजार तीन सयसहित पक्राउ गरी विक्रम र खगेन्द्रलाई सोधपुछ गर्दा इलामको घरमा लागूऔषध लुकाई राखेको भन्ने खुल्न आएकोले उनीहरुको घरमा गई खानतलासी गर्दा विक्रम कोठाबाट लागूऔषध ५ ग्राम र खगेन्द्र सावाको कोठाबाट ब्राउन सुगर २ ग्राम ३०० मिलिग्राम बरामद गरेको हो ।
पक्राउ परेका चारैजना उपर इलाका प्रहरी कार्यालय दमक झापाबाट थप अनुसन्धान भइरहेको छ ।