पाँचथरः पाँचथरको फालेलुङ–३ माङलेबुङस्थित भित्री कच्ची सडक खण्डमा ट्याक्टर दुर्घटनामा परेको छ ।
दुर्घटनामा एकजनाको मृत्यु समेत भएको छ । दुर्घटनामा परेर ट्याक्टरमा सवार फालेलुङ–३ का ५४ वर्षीय लक्ष्मी विष्टको मृत्यु भएको प्रहरीले जनाएको छ । यस्तै, दुर्घटनामा तीनजना घाइते समेत भएका छन् । बुधबारसाँझ सो घटना भएको हो । दुर्घटनामा गम्भीर घाइते भएका विष्टको उपचारका क्रममा जिल्ला अस्पताल पाँचथरमा मृत्यु भएको प्रदेश १ ट्राफिक प्रहरी कार्यालय इटहरीका प्रवक्ता डिएसपी सुमन तिमल्सिनाले जानकारी दिए ।
खाद्यान्न तथा जस्तापाता लिएर जाँदै गरेको मे. १ त. ६५७७ नम्बरको टयाक्टर सडकबाट अन्दाजी ३० मिटर तल खसेको थियो । उनका अनुसार दुर्घटनामा परेर ट्याक्टर चालक ४० वर्षीय अक्कलबहादुर लिम्बू, ट्याक्टरमा सवार ४६ वर्षीय कर्ण राई र ३० वर्षीय मनकुमार राई घाइते भएका छन् । फालेलुङ–३ घर भएका तीनै जना घाइतेको पाँचथर अस्पतालमै उपचार भइरहेको छ ।
वर्षाका कारण कच्ची सडक हिलाम्य रहेको रट्याक्टर दुर्घटनामा परेको हुनसक्ने प्रहरीले अनुमान गरेको छ । प्रहरीले दुर्घटनाबारे अनुसन्धान भइरहेको जनाएको छ ।