बिर्तामोडः मोरङको रङ्गेली–९ सखुवाथान घर भई झापा गौरादह-१ शितलचौक बस्दै आएका ३९ वर्षीय सजीलाल रिख्यासनलाई आफ्नै श्रीमतीको हत्या गरेको अभियोगमा पक्राउ गरिएको छ ।
रिख्यासनले गत असार ३१ गते आफ्नै श्रीमती ३४ वर्षीया संगीता टुडुलाई खेतनजिक रहेको टहरामा लगेर कुटपिट गरी हत्या गरेर उनी फरार भएको १ नम्बर प्रदेश प्रहरी कार्यालय विराटनगरका सूचना समन्वय अधिकृत प्रहरी उपरीक्षक नविनराज राईले जानकारी दिए ।
घटनाको जानकारी पाउनसाथ अनुसन्धान तथा खोजतलसामा खटिएको प्रहरी टोलीले फरार रहेका सजिलाल रिख्यासनलाई सोमबार पक्राउ गरी सार्वजनिक गरेको हो ।
पक्राउ परेका रिख्यासन उपर कर्तब्य ज्यान मुद्दामा कानुनी कारवाही तथा घटना सम्बन्धमा थप अनुसन्धान भइरहेको जिल्ला प्रहरी कार्यालय झापाले जनाएको छ ।