धरानः बराहक्षेत्रमा महिलामाथि एसिड हानेर भागेका युवा पक्राउ परेका छन् ।
सुनसरीमा एसिड प्रहार गरेर भागेका युवालाई प्रहरीले काठमाडौंबाट पक्राउ गरेको हो । सुनसरीको बराहक्षेत्र नगरपालिका–३ घर भएका ३० वर्षीय रोमनराम धामी काठमाडौंमा पक्राउ परेका हुन् ।
उनलाई सुनसरी ल्याइएको सुनसरीका एसपी सञ्जयसिंह थापाले जानकारी दिए । साउन २२ मा राति धामीले २८ वर्षीया पत्नी सरस्वती बस्नेतलाई प्रहार गर्न खोजेको एसिड लागेर छिमेकी ४३ वर्षीया श्यामकुमारी धामी घाइते भएकी थिइन् ।
चुरोटको विषमा विवाद हुँदा छिमेकीको शरणमा पुगेकी श्रीमतीलाई रोमनरामले लखेटेर एसिड हान्ने प्रयास गरेका हुन् । छुट्याउन खोज्दा २१ वर्षका सुमनराज धामी र १९ वर्षीय सुजनराज धामी समेत एसिडको छिटा लागेर घाइते भएका थिए ।
एसिड परेर गम्भीर घाइते भएकी श्यामकुमारीको विराटनगरस्थित म्याक्स अस्पतालमा उपचार भइरहेको छ । आरोपमाथि एसिड आक्रमण विरुद्धको कसुर, कुटपिट र अङ्गभङ्गसम्बन्धी कसुरमा जिल्ला अदालतबाट ७ दिनको म्याद लिएर अनुसन्धान भइरहेको एसपी थापाले बताए ।