उदयपुरः उदयपुरको बेलका नगरपालिकाले सुँगुरको मूर्ति बनाइएको छ ।
सुगुरको मूर्ति उदयपुरको बेलका नगरपालिकाले निर्माण गरेको हो । १२ फिट अग्लो सो मूर्तिको लम्बाई १६ फिट छ । बेलका नगरपालिका वडा नम्बर ७ मैनामैनी मूलगाउँमा निर्माण भएको मूर्तिका लागि ६० लाख रुपैयाँ रकम खर्च भएको बेलका नगरपालिकाका मेयर दुर्गाकुमार थापा (स्वस्तिक) ले जानकारी दिए ।
मूर्ति निर्माणको अधिकांश काम सकिएको छ । अब यसलाई दशैंसम्ममा औपचारिक उद्घाटन गर्ने तयारी रहेको मेयर थापाको भनाई छ । नगरपालिकाले आफ्नै लगानीमा बनाएको सो मूर्ति क्षेत्रमा धार्मिक पार्कसमेत बनाउने योजना अनुसार काम अगाडि बढाएको छ ।
टाढाबाट वा तस्वीरमा हेर्दा हुबहुँ सुँगुरजस्तै देखिने कद पाइसकेको मूर्तिको डिजाइन राष्ट्रिय प्रज्ञा प्रतिष्ठानले गरेको हो । निर्माणाधीन मूर्ति मूर्तिकार धनु याख्खाको नेतृत्वमा निर्माणाधीन छ । सो मूर्ति निर्माणअगावै भाइरल समेत भइसकेको छ ।