उदयपुरः झरना घुम्न पुगेकी महिलाको रुखले किचेर मृत्यु भएको छ ।
श्रीमानसहित अटो लिएर अधेरी झर्ना घुम्न आएका थिए । प्र.२-०१-००१ ह ०५६० नम्बरको अटो (टेम्पो) र स१०प ३२७२ नम्बरको मोटरसाइकललाई रुखले किच्दा अटोमा बसेकी ३८ वर्षीया निशा मगर दनुवारको घटनास्थलमै मृत्यु भएको प्रहरीले जनाएको छ ।
उदयपुरको उदयपुरगढी गाउँपालिका-७ अँधेरी झरना नजिकै शनिबार दिउँसो सो घटना भएको हो । तीनजना घाइते समेत भएका छन् । रुख एक्कासी ढल्न पुगेको र किचेको जिल्ला प्रहरी कार्यालय उदयपुरका डीएसपी वेदप्रसाद गौतमले जानकारी दिए ।
मदन भण्डारी राजमार्गअन्तर्गत अँधेरी झरनानजिक रोकिरहेको अटोमाथि रुखले किच्न पुगेको र घटनास्थलमै महिलाको मृत्यु भएको प्रहरीले जनाएको छ ।
रुखले किच्दा निशाका ४० वर्षीय श्रीमान श्याम दनुवार, अर्की २७ वर्षीया मिना दनुवार र अटो चालक कटारी नगरपालिका–५ का ४८ वर्षीय कुमार तामाङ घाइते भएको उनले जानकारी दिए । घाइतेमध्ये अटो चालक तामाङ गम्भीर छन् । अन्यको अवस्था सामान्य रहेको प्रहरीले जनाएको छ । घाइतेको कटारी अस्पतालमा उपचार भइरहेको छ ।