धरानः इटहरीमा चेकजाँचको क्रममा १७ पोका गाँजा फेला परेको छ ।
इटहरी–१२ कोशी राजमार्गमा इलाका प्रहरी कार्यालय इटहरीको प्रहरी टोलीले सवारी साधन चेकजाँच गर्ने क्रममा इटहरीबाट विराटनगरतर्फ जाँदै गरेको प्र.१–०२–०४३ प.८८०४ नं. को मोटरसाइकलमा गाँजा भेटेको प्रहरीले जनाएको छ ।
धनकुटा साँगुरीगढी गाउँपालिका–८ घर भई इटहरी-४ मा डेरा गरी बस्ने वर्ष २७ को दीपेन्द्र राई र मोटरसाइकलको पछाडि सिटमा सवार निजको श्रीमती वर्ष २५ की सर्मिला राईको बीचमा ह्याप्पी बर्थडे लेखिएको रंगीचंगी रयापिङ पेपरले बाहिरबाट बेरी राखेको अवस्थामा कार्टुन र मोटर साइकलको बायाँ लेगगार्डमा झुण्ड्याई बोकेको जेब्रा झोलाभित्र प्लाष्टिकमा प्याक गरेको ४ पोका र कार्टुनभित्र प्लाष्टिकमा प्याक गरेको १७ पोका गाँजा फेला परेको प्रहरीले जनाएको छ ।
सो गाँजाको तौल २१ (एक्काइस) किलो रहेको प्रहरीले जनाएको छ । गाँजा ओसारपसारमा संलग्न अररिया जिल्ला जोगवनी थाना पिपरा पञ्चायत ०६ विसनपुर (विहार, भारत) बस्ने वर्ष ३० को टुनटुन यादवलाई समेत मोरङ प्रहरीको सहयोगमा विराटनगर-१५ बाट पक्राउ गरिएको जिल्ला प्रहरी कार्यालय सुनसरीका एसपी सञ्जयसिंह थापाले जानकारी दिए । उनीहरुमाथि बुधबार सुनसरी जिल्ला अदालतबाट लागूऔषध मुद्दामा ९ (नौ) दिन म्याद लिई थप अनुसन्धान भैरहेको प्रहरीले जनाएको छ ।
यस्तै, धरान-१७ नमूना सुन्दरबस्ती सर्दुखोलाको बगरमा अप्रपोष्ट रेल्वेबाट खटिएको गस्ती टोलीले वेबारिसे अवस्थामा रहेको १ बोरा गाँजा (अन्दाजी २० केजी) फेला पारेको र गाँजा इलाका प्रहरी कार्यालय धरानमा ल्याइएको डिएसपी नरेन्द्र कुँवरले जानकारी दिए ।