धरानः झापाको कचनकवल गाउँपालिका–६ स्थित भित्री पक्की सडक खण्डमा दुर्घटना हुँदा एकजनाको मृत्यु भएको छ ।
सोमबार राति साढे ८ बजे सो दुर्घटना भएको हो । गम्भीर घाइते वर्ष ३७ को सोम दाहालको बिएण्डसी अस्पतालमा उपचारको क्रममा ९ बजे मृत्यु भएको प्रदेश १ ट्राफिक प्रहरी कार्यालय इटहरीका डिएसपी सुमन तिम्सिनाले जानकारी दिए ।
पश्चिमबाट पूर्वतर्फ आउँदै गरेको मे१०प ५२८९ नं. को मोटरसाइकल र विपरीत दिशाबाट जाँदै गरेको मे८प २१३७ मोटरसाइकल एकआपसमा ठक्कर खाएका थिए । मे१०प ५२८९ नं. को मोटरसाइकल चालक वर्ष २६ को करण राजवंशी र सोही मोसामा सवार वर्ष १८ कि जयामति राजवंशी गम्भीर घाइते भएका थिए ।
दुवै मोटरसाइकल इलाका प्रहरी कार्यालय बनियानीको नियन्त्रणमा रहेको प्रहरीले जनाएको छ । तीव्रगतिको कारण दुर्घटना भएको प्रहरीले जनाएको छ ।
धरानमा दुर्घटना: युवती गम्भीर
यस्तै, धरानमा पिकअपलाई ओभरटेक गर्ने क्रममा दुर्घटना हुँदा दुईजना घाइते भएका छन् । एकजना गम्भीर बनेका छन् भने एकजना सामान्य घाइते छन् । धरानको तीनकुनेस्थित विश्वकर्मा मन्दिरअगाडि सो दुर्घटना भएको हो ।
इटहरीबाट धरानतर्फ आउँदै गरेको प्र १–०२–००२च४७८३ नं को पिकअपलाई सोही दिशाबाट आउँदै गरेको को३४प ९४०१ नम्बरको मोटरसाइकलले ओभरटेक गर्ने क्रममा पिकअपको लुकिङ ग्लासमा ठक्कर खाएको थियो ।
दुर्घटनामा मोटरसाइकल चालक सिन्धुली पाचन ११ बस्ने वर्ष २५ को सन्तोष अधिकारी सामान्य घाइते भएका छन् । यस्तै, मोटरसाइकलमा पछाडि सवार सवार हिले १ धनकुटा बस्ने वर्ष १९ कि मनिषा पौडेल गम्भीर घाइते भएकी छिन् ।
उनको टाउकोमा चोट लागेको प्रहरीले जनाएको छ । उनको धरानस्थित बीपी प्रतिष्ठानमा उपचार सम्भव नभएपछि न्यूरो अस्पताल विराटनगरमा उपचार भइरहेको छ । पिकअप चालक मोरङ सुन्दरहरैंचा ६ बस्ने मनिष चापागाई र दुवै सवारी साधन प्रहरी चौकी तीनकुनेको नियन्त्रणमा रहेको प्रहरीले जनाएको छ । मोटरसाइकल तीब्र गतिमा कुदाएका कारण दुर्घटना भएको प्रहरीले जनाएको छ ।