संखुवासभाः संखुवासभाको मादी नगरपालिका-१ उम्लिङ खोलागाउँमा भएको सामूहिक हत्या प्रकरण अनुसन्धानका लागि प्रदेश नम्बर १ का प्रहरी प्रमुख नायब महानिरीक्षक अरुणकुमार बिसी मादी पुगेका छन् ।
जिल्ला प्रहरी कार्यालय संखुवासभाका प्रहरी प्रमुख डिएसपी लालध्वज सुवेदीले घटनाको थप अध्ययनका लागि उनी घटनास्थल पुगेको जानकारी दिए ।
प्रहरीले घटनाबारे सुक्ष्म अनुसन्धान गरिरहेको र अनुसन्धान प्रगतितर्फ उन्मुख रहेको डिएसपी सुवेदीले बताए । ‘अहिलेसम्म कसैलाई पक्राउ गर्न नसकिएपनि अनुसन्धान प्रगतिउन्मुख छ’, उनले भने ।
यसअघि स्थानीयबासीले शव उठाउन दिएका थिएनन् । घटनाबारे ‘पार’ नलगाउञ्जेलसम्म प्रहरीको सबै टोली गाउँमै रहने मेयर विदुर लिंथेपलगायत प्रहरीको टोलीले नै आश्वासन दिएपछि उनीहरुले शव उठाउन दिएका थिए । शवको धरानमा पोष्टमार्टमपछि इटहरीमा सामूहिक दाहसंस्कार समेत भइसकेको छ । पोष्टमार्टमको रिपोर्ट आएपछि प्रहरीले थप ‘क्लु’ भेट्टाउने जनाउँदै आएको छ ।
घटना अनुसन्धानका लागि सिआईबीको टोली पनि खोला गाउँमै छ । यस्तै, हत्या अनुसन्धानमा केन्द्रीय अनुसन्धान ब्यूरो (सिआइबी), प्रदेश प्रहरी कार्यालयको रिजनल इन्भेष्टिगेशन टिम, जिल्ला प्रहरी कार्यालय सङ्खुवासभा र इलाका प्रहरी कार्यालय चैनपुरको टोलीसहित करिब ४० जना प्रहरी घटनाको अनुसन्धानमा जुटेका छन् ।
हत्या प्रकरणमा प्रहरीले चिनेजानेकै व्यक्तिबाट उनीहरुको हत्या भएको प्रारम्भिक निष्कर्ष निकालेको छ । घटनास्थलको सुक्ष्म अनुसन्धानपछि प्रहरीले यस्तो निष्कर्ष निकालेको हो । परिवारका एक सदस्यको हत्यापछि आफ्नो पहिचान खुल्ने डरले बालबालिकालगायत सबैको हत्या गरेको हुनसक्ने अनुमान प्रहरीको छ । आफ्नो पहिचान खुल्ने डरले हत्याराले सबैको हत्या गरेको हुनसक्ने प्रहरीले बताएको छ । तेजबहादुर कार्कीको हत्यापछि परिवारका अन्य प्रत्यक्षदर्शीको पनि हत्या भएको हुनसक्ने अनुमान गरिएको हो ।
शव फेला परेको स्थान, शवको प्रकृतिलगायतका विषय हेर्दा ‘एक जनाको मात्र हत्या गर्ने उद्देश्य भए पनि परिवारका अन्य सदस्यले देखेपछि पहिचान खुल्ने डरले हत्याराले ६ जनाकै हत्या गरेको हुनसक्ने’ निष्कर्ष निकालेको हो । सबैभन्दा पहिले तेजबहादुरलाई आक्रमण गरेको हुनसक्ने देखिएको छ । सो दिन बारीमा खेताला बोलाएकाले तेजबहादुर बिहानै घरबाट निस्किएको प्रहरीको निष्कर्ष छ । तेजबहादुरको गोडामा बुट जुत्ता पनि भेटिएकाले उनी बिहानै कामका लागि निस्किएको हुनसक्ने प्रहरीको भनाइ छ । जब तेजबहादुरमाथि आक्रमण भयो, त्यसपछि उनी चिच्याएको र चिच्याएपछि तेजबहादुरकी श्रीमती कमला र बुहारी रञ्जना दौडिँदै घटनास्थलतर्फ गएको हुनसक्ने प्रहरीको अनुमान छ । घटनास्थलको प्रकृति हेर्दा उनीहरु सबैलाई लखेट्दै मारेको हुनसक्ने अनुमान गरिएको छ ।