सुनसरीः सुनसरी रामधुनी–६ कान्छीचौक–चतरा सडक खण्डको सुनसरी खोला पुलमा मोटरसाइकल अनिन्त्रित भई दुर्घटना हुँदा चालकको मृत्यु छ भने पछाडि सवार घाइते भएका छन् ।
मृत्यु हुनेमा मोरङ कानेपोखरी गाउँपालिका ६ का १८ वर्षीय रितिक राई रहेका छन् भने पछाडि सवार सोही स्थानका २१ वर्षीय निरज राईको उपचार भइरहेको छ ।
गत राति १२ बजे उत्तरतर्फ जाँदै गरेको को३६प ९५८ नम्बरको मोटरसाइकल आफै अनियन्त्रित भई पुलमा ठोक्किएर दुर्घटना हुँदा दुवैजना घाइते भई उपचारको लागि धरानमा पठाइएको प्रहरीले जनाएको छ ।
उपचारको क्रममा रितिकको शुक्रबार बिहान ३ बजे मृत्यु भएको छ । अर्का घाइते निरजलाई थप उपचारको लागि विराट नर्सिङ होम विराटनगर रेफर गरिएको छ । दुर्घटना भएको मोटरसाइकल इलाका प्रहरी कार्यालय पकलीमा रहेको छ । घटनाबारे थप अनुसन्धान भइरहेको छ ।
यस्तै, संखुवासभा मकालु गाउँपालिका ३ समटार स्थित निर्माणाधीन खाँदबारी-किमाथाङ्का सडक खण्डमा रौता कन्स्ट्रक्सन कम्पनीको जेसिबी ब्याक होइ लोडर (भ्याकुलोडर) दुर्घटना हुँदा एकजनाको मृत्यु भएको छ ।
मृत्यु हुनेमा संखुवासभा खाँदबारी नगरपालिका ६ माथिल्लो पाङ्ठाका २४ वर्षीय श्याम विक रहेका छन् । विकले चलाएको ज१क४१२ नम्बरको सो लोडरमा काम गर्ने क्रममा पल्टेर १०० मिटर तल झरी दुर्घटना हुँदा उनको घटनास्थलमै मृत्यु भएको थियो ।
घटनाको जानकारी पाएलगत्तै इप्रका हेदाङनाबाट प्रहरी टोली खटि गई कानुनी प्रक्रिया पूरा गरी शवलाई पोष्टमार्टमको लागि जिल्ला अस्पताल खाँदबारी पठाइएको छ । घटना सम्बन्धमा थप अनुसन्धान भइरहेको नम्बर प्रदेश प्रहरी कार्यालय विराटनगरका सूचना समन्वय अधिकृत प्रहरी उपरीक्षक नविनराज राईले जानकारी दिए ।