धरानः यसपटक राष्ट्र बैंकले असोज ४ गतेदेखि नयाँ नोट सटही गर्ने भएको छ । केन्द्रीय बैंकले दशैं–तिहार लक्षित गरी २ खर्ब रुपैयाँ बराबरका नयाँ नोट सटही गर्ने भएको हो ।
राष्ट्र बैंकले गत वर्ष कोभिड–१९ को संक्रमण जोखिमको कारण नयाँ नोट सटही गरेको थिएन । तर, यसपटक भने गत वर्षको नयाँ नोट नपाउँदा सर्वसाधारणको गुनासो आएको हुँदा स्वास्थ्य मापदण्ड पालना लगाइ नयाँ नोट वितरण गर्ने उनले बताए ।
केन्द्रीय बैंकले असोज ४ गतेदेखि असोज २४ गतेसम्म वितरण गर्ने राष्ट्र बैंक नोट विभागका कार्यकारी निर्देशक रेवतीप्रसाद नेपालले बताए । ‘बैंकहरुलाई भने एक साता अघिदेखि नयाँ नोट दिन थालेका छौं, सर्वसाधारणका लागि भने असोज ४ गतेदेखि वितरण हुन्छ,’ नेपालले भने, ‘दशैको विदा शुरु नहुँदासम्म काठमाडौंलगायत ७ वटै प्रादेशिका कार्यालयबाट नयाँ नोट वितरण हुनेछ ।’
साना र ठूला दरका नोट गरी प्रतिव्यक्ति अधिकतम १८ हजार ५ सय रुपैयाँ वितरण गरिने उनले जानकारी दिए । संस्थागत प्रयोजनका लागि भने राष्ट्र बैंकले २ करोडदेखि ५ करोड रुपैयाँसम्म नयाँ तथा सुकिला नोट उपलब्ध गराउने छ ।
साना दरका नोटमा ५, १०, ५० र १०० दरका नोट हुन् भने ५०० र १००० दरका नोटलाई ठूला दरका नोटमा राष्ट्र बैंकले वर्गीकरण गरेको छ । यसबाहेक सुकिला नोटहरु समेत पर्याप्त स्टकमा रहेको हुँदा नोट सटहीका लागि कुनै पनि समस्या नहुने नेपालले बताए ।