संखुवासभाः संखुवासभा सामूहिक हत्या प्रकरणमा थप एक नियन्त्रण लिइएको प्रहरीले जनाएको छ ।
संखुवासभाको मादी–१ उम्लिङमा ६ जनाको सामूहिक हत्याको अभियोगमा यसअघि लोकबहादुर कार्की पक्राउ परेका थिए । अहिले उनका भाइलाई पनि नियन्त्रणमा लिएको प्रहरीले जनाएको छ । नयाँ तथ्य खुलेपछि उनलाई नियन्त्रणमा लिएर सोधपुछ थालिएको संखुवासभाका डिएसपी लालध्वज सुवेदीले जानकारी दिए । ‘नयाँ तथ्य आएकोले अहिले उनका भाइलाई नियन्त्रणमा लिएर सोधपुछ गरिरहेका छौं’, उनले भने, ‘पछि केही कुरा खुल्ला ।’
उनले प्रहरी अहिले घटनास्थलमै रहेकोले आफन्तलगायत अन्यलाई सोधपुछ गर्नु स्वभाविक भएको बताए । ‘अहिले पनि प्रहरी घटनास्थलमै छ’, उनले भने, ‘घटनास्थलममा भएपछि केही नयाँ कुरा आएपछि सोधपुछलगायतका काम भइरहेकै छन् ।’
प्रहरीका अनुसार हत्या गरिएकी ३२ वर्षीय बुहारी रञ्जना कार्कीको मोबाइल हराएको थियो । अनुसन्धानमा संलग्न प्रहरी अधिकारीले लोकबहादुरका भाइ नरेशको साथबाट सो मोबाइल बरामद गरेका छन् । नरेश प्रत्यक्षदर्शी रहेको थाहा भएको प्रहरी स्रोत बताउँछ । उनी पनि लोकबहादुरले हत्या गर्दैगर्दा पछि पछि रहेको प्रहरी स्रोत बताउँछ । नरेश रञ्जना सुत्ने कोठामा पसेर मोबाइल लिएर हिँडेको खुलेको प्रहरी स्रोत बताउँछ ।
उनीमाथि इलाका प्रहरी कार्यालय, चैनपुरले थप अनुसन्धान गरिरहेको प्रहरीले जनाएको छ । सामूहिक हत्यामा ज्यान गुमाउने मध्ये एकजनाको मोबाइल लोकबहादुरको घरबाट बरामद भएको छ र नरेशले मोबाइल लुकाएको हुनसक्ने प्रहरीको आशंका छ ।
घटना बिहानकै समयमा भएपनि कसैले देखेको र कराएको आवाजसमेत नसुनेको बयान स्थानीयले दिएका थिए । एकजनाले मात्रै कसरी घटना घटाउन सक्लान् ? यो प्रश्न अहिले उब्जिएको थियो । घटनामा कुनै धारिलो तयार प्रयोग नहुनु, मृतकको टाउकोमा सामान्य चोट देखिनु, ६ जनाको शव चार स्थानमा करिब सय मिटर आसपास भेटिनु आदि कारणले एक्लैले यत्रो घटना घटाएको हो भन्नेमा आशङ्का समेत थियो । एक्लैले छोटो समयमा यस्तो घटना गर्न नसक्ने प्रहरी अनुसन्धान पनि भन्छ । अन्य व्यक्तिको पनि यस घटनामा संलग्नता हुने भन्दै प्रहरीले अनुसन्धानको दायरा बढाएको जनाइएको थियो ।