ताप्लेजुङः १८ वर्षीया युवती पुष्पा तबेबुङ लिम्बूको हत्या भएको प्रहरीले दाबी गरेको छ । प्रहरीले हत्या आरोपमा एकजनालाई पक्राउ गरेको छ ।
शव फेला परेको तीन दिनपछि ती किशोरीको हत्या गरेको आरोपमा फुङ्लिङ नगरपालिका-१० फुरुम्बुका २४ वर्षीय रामकुमार कार्कीलाई प्रहरीले पक्राउ गरी आइतबार मात्रै सार्वजनिक गरेको हो । उनी शनिबार राति पक्राउ परेका थिए ।
घरबाट हिँडेकी एक १८ वर्षीया युवती गत शुक्रबार मृत भेटिएकी थिइन् । भानुजन माध्यमिक विद्यालयमा कक्षा–११ मा अध्ययनरत ती युवती मृत भेटिएकी थिइन् । फुङलिङ नगरपालिका-७ मा उनको शव फेला परेको प्रहरीले जनाएको छ ।
जिल्ला प्रहरी कार्यालय ताप्लेजुङका डिएसपी बालनरसिंह राणाले अहिले अभियुक्त पक्राउ गरिसकेको जानकारी दिए । बिहीबार साँझ घरबाट हराएकी पुष्पाको शव नजिकै विषको बट्टा समेत फेला परेको थियो ।
उनको शव स्थानीयले भीरमा लडेको अवस्थामा देखेपछि प्रहरीलाई खबर गरेका थिए । घटनास्थलमा मेटासिटको बोतल भेटिएको थियो भने शरीरभरी चोट पनि थियो ।

माया प्रेमका कारण उनको ज्यान गएको प्रहरीकले जनाएको छ । जिल्ला प्रहरी कार्यालय ताप्लेजुङका अनुसार हत्या आरोपी कार्की र किशोरीबीच करिब ९ महिनादेखि प्रेम सम्बन्धसँगै शारीरिक सम्बन्धसमेत भएको थियो । विवाहको प्रसङ्ग उठाउँदा अस्वीकार गरेपछि विवाद हुँदा किशोरीको हत्या गरेको कार्कीले प्रहरी समक्ष बयान दिएका छन् । ती युवाले फुङलिङको सेते चौतारा छेउमा लगेर विष सेवन गराइ पहाडबाट धकेलेको बयान समेत दिएको प्रहरीले जनाएको छ । नाटकीय ढंगले मोटरसाइकलमा लगेर धकेलेको हुनसक्ने प्रहरीले जनाएको छ ।
फुङलिङ-७ दोखुको सेती चौतारा नजिक निगाले भीरमा उनको शव फेला परेको थियो । जिल्लाको फक्ताङ्लुङ गाउँपालिका–३ लिङ्खिम घर भई हाल सदरमुकाम फुङलिङको बिहीबारे टोलमा डेरा गरी बस्दै भएकी पुष्पाको शव शंकास्पद अवस्थामा फेला परेपछि सोहीअनुसार प्रहरीले घटनाको अनुसन्धान प्रक्रिया अघि बढाएको थियो ।
पीडित परिवारले समेत पुष्पाको हत्या भएको र हत्यामा संलग्नता हुन सक्ने भन्दै पक्राउ गरी अनुसन्धान गर्न भनी ती युवकमाथि नै किटानी जाहेरी दिएका थिए । पीडित परिवारको किटानी जाहेरी र घटनाको अनुसन्धानको क्रमसँगै पक्राउ परेका युवकले आफैँले हत्या गरेर शव फालेको स्वीकारेपछि प्रहरीले उनलाई सार्वजनिक गरेको हो ।
लामो समयदेखि नै आफूलाई गाली गलोज गर्ने तथा अनावश्यक तनाव दिने गरेका कारण योजनामै हत्या गरेको कार्कीको बयान रहेको जिल्ला प्रहरी कार्यालयले जनाएको छ ।
हत्या गरिएकी पुष्पाका बुबा वीरबहादुर लिम्बूले छोरीको हत्या नै भएको आशंकामा किटानी जाहेरी दिएको र घटनामा संलग्नलाई पक्राउ नगरेसम्म न्यायका लागि आन्दोलित हुने साथै महिनौं दिनसम्म पनि शव नबुझ्ने पत्रकार सम्मेलनमा बताएका थिए ।
हत्या आरोपी सार्वजनिक गरेपछि आफन्तले शव बुझेका जिल्ला प्रहरी कार्यालय ताप्लेजुङले जनाएको छ । ताप्लेजुङ जिल्ला अस्पतालमा शव पोस्टमार्टम गरी परिवारलाई बुझाएको प्रहरीले जनाएको छ । प्रनाउ राणाका अनुसार जिल्ला अदालतबाट म्याद थपेर आरोपी उपर थप अनुसन्धान कार्य अगाडि बढाइएको छ ।