सोलुखुम्बुः सोलु लिखुपिके ५ स्थित लिखु जलविद्युत आयोजनाको सुरुङमा काम गरिरहेका मजदुरहरुको माथिबाट ढिस्को झरी एक जना मृत्यु र दुईजना घाइते भएका छन् ।
मृत्यु हुनेमा खोटाङका २८ वर्षीय रामकृष्ण राई र घाइते हुनेहरुमा दोलखा जिरी २ का २१ वर्षीय जगत श्रेष्ठ र ओखलढुंगा मोलुङ ८ का २८ वर्षीय प्रविन्द्र राई रहेका छन् ।
सोमबार बिहान ३ बजे सुरुङमा काम गरिरहेको अवस्थामा रामकृष्णको ढिस्को झरी अन्दाजी ४०० मिटर तल खस्दा घटनास्थलमै मृत्यु भएको थियो भने जगत र प्रविन्द्रको सोही ढिस्कोले पुरिएर घाइते भएका थिए । घाइतेहरुलाई उपचारको लागि हेलिकप्टरबाट केएमसी हस्पिटल काठमाण्डौ लगिएको छ ।
घटनास्थलमा प्रहरी चौकी किन्जा र प्रहरी चौकी चौलाखर्कबाट प्रहरी टोली खटि गई थप अनुसन्धान भएको १ नम्बर प्रदेश प्रहरी कार्यालय विराटनगरका सूचना अधिकृत तथा प्रहरी उपरीक्षक नविनराज राईले जानकारी दिए ।