बिर्तामोडः जंगली हात्तीले सुँडले च्यापेर जंगलभित्र लगिएकी महिला मृत भेटिएकी छिन् । उनको शव पैनीमा फेला परेको प्रहरीले जनाएको छ ।
हात्तीको आक्रमणपछि सुँडले च्यापेर जंगलभित्र लगेको र बेपत्ता बनेकी झापा बिर्तामोड–८ की लतुमाई मर्डीको शव फेला परेको हो । बिहीबार बिहान ११ बजेर ५० मिनेटमा जंगली हात्तीले आक्रमण गरेको र बिहानदेखि बेपत्ता उनको स्थानीयको सहयोगमा अपराह्न ४ बजेतिर शव भेटिएको हो ।
निगुरो खोजेर बिक्री गर्दै दैनिकी चलाउने लतुमाई र उनका श्रीमान शुकलाल मर्डी बिहान भद्रपुर १० मा पर्ने चारआली जंगलमा निगुरो खोज्न गएका थिए । उनको शब भद्रपुर–१० स्थित सेतीखोला पैनीमा खोजीका लागि खटिएको सुरक्षा निकायको टोलीले फेला पारेको थियो । शुकलालले भने भागेर ज्यान जोगाएका थिए ।
श्रीमतीलाई हात्तीले लगेको तत्काल उनका श्रीमान् शुकलालले अस्थायी प्रहरी चौकी गरामनीलाई जानकारी गराएका थिए । महिलाको खोजीका लागि डिभिजन वन कार्यालय झापाका कर्मचारी, नेपाली सेना, सशस्त्र प्रहरी, नेपाल प्रहरी र स्थानीयवासी जङ्गल पसेका छन् । यसअघि जङ्गलभित्र महिलाको चप्पल, पोतेको झुत्तो र अलिकति कपालको गुजुल्टो फेला र अहिले उनको शव समेत भेटिएको  जिल्ला प्रहरी कार्यालयका प्रवक्ता राकेश थापाले जानकारी दिए ।