धरानः संखुवासभा, संखुवासभा जिल्लाका विद्यालय तहमा मातृभाषा शिक्षा दिने नीतिअनुसार जिल्लामा पहिलोपटक लिम्बू भाषा शिक्षण प्रारम्भ भएको छ ।
सभापोखरी गाउँपालिका वडा नं. ५ को अति दुर्गम स्थानमा रहेको श्री प्रकाश आधारभूत विद्यालय फाकुवामा, गाउँपालिकाको अनुदान स्रोतअन्तर्गतको प्राथमिक तहमा लिम्बू भाषा शिक्षक नियुक्ति गरिएको छ ।
स्थानीय तहमा मातृभाषामा शिक्षा दिन सभापोखरी गाउँपालिकाको कार्यनीतिअनुसार लिम्बू भाषा शिक्षणका लागि शिक्षक नियुक्ति गरिएको किरात याक्थुङ चुम्लुङ सभापोखरी गाउँपालिकाका अध्यक्ष मदन सेरेङ मादेनले बताए ।
सो शिक्षक नियुक्तिको लागि श्री त्रिवेणी माध्यमिक विद्यालय बाह्रविसे स्रोतकेन्द्रमा परिक्षा संचालनमा धनकुटा साँगुरीगढी गाउँपालिका –२ धनकुटाका प्रभात तुम्बापो लिम्बू उत्तीर्ण भई नियुक्ति भएको विद्यालय प्रधानाध्यापक वीरेन्द्र महतो र विद्यालय व्यवस्थापन समिति अध्यक्ष अभिषेक लिम्बूको हस्ताक्षरिता परीक्षा नतिजा तालिकामा उल्लेख गरेको छ । सो परीक्षा संचालन लिम्बू भाषा एवं लिपी प्रशिक्षक स्वर्णिमहाङ फोम्बो (लिम्बू) ले सहजीकरण गरेका थिए ।
लिम्बू भाषा शिक्षणको लागि कक्षा १ देखि ८ सम्मका पाठ्यक्रम र पाठ्यपुस्तक किरात याक्थुङ चुम्लुङको सहयोगमा पाठ्यक्रम विकास केन्द्रबाट तयार भई विद्यालयहरुमा लिम्बू भाषा शिक्षण भइरहेको कियाचु केन्द्रीय सदस्य उतमकुमार लिङ्थेपले वताए ।
यस्तै सोही दिन श्री त्रिवेणी माध्यमिक विद्यालय बाह्रविसेमा कक्षा ११ र १२ मा अध्ययनरत ५४ जना विद्यार्थीहरुलाई लिम्बू भाषा शिक्षण तथा सिरिजङ्गा लिपी लेखनसम्बन्धी जानकारी दिन आयोजित कार्यक्रम प्रशिक्षक फोम्बाले सञ्चालन गरेका थिए ।