विराटनगरः शनिबार बेलुका मोरङ, झापा र उदयपुरमा भएको छुट्टाछुट्टै भएको सवारी दुर्घटनाबाट ७ जनाले ज्यान गुमाएका छन् भने ७ जना घाइते भएका छन् ।
शनिबार बेलुका ६ बजे मोरङको केराबारी गाउँपालिका ९ बेलचौरीस्थितमा उत्तरबाट दक्षिणतर्फ आउँदै गरेको को४०प १७२७ नम्बरको मोटरसाइकल र विपरीत दिशाबाट जाँदै गरेको बा१०च ४३०० नम्बरको स्कारपियो एक आपसमा ठक्कर खाई दुर्घटना हुँदा मोटरसाइकल सवार तीनजनामध्ये दुईजनाको घटनास्थलमै र एकजनाको उपचारको क्रममा मृत्यु भएको छ ।
मृत्यु हुनेमा चालक लेटाङ नगरपालिका २ का ३० वर्षीय कमल कार्की र पछाडि सवार पथरीशनिश्चरे नगरपालिकाका ५५ वर्षीय तिलकबहादुर सुवेदीको घटनास्थलमा मृत्यु भएको छ भने पछाडि सवार लेटाङ नगरपालिका २ कि ४५ वर्षीया सीता कार्कीको धरानस्थित बीपी प्रतिष्ठानमा उपचारको क्रममा बेलुका सवा ७ बजे मृत्यु भएको हो ।
गाडी र गाडी चालक लेटाङ नगरपालिका २ का ४७ वर्षीय पुष्पबहादुर मगर इलाका प्रहरी कार्यालय बेलबारीको नियन्त्रणमा रहेको प्रहरी उपरीक्षक नविनराज राईले जानकारी दिए ।
यस्तै, शनिबार बेलुका पौने ६ बजे मोरङ रंगेली नगरपालिका ६ टकुवा–पिपल चौक भित्री सडक खण्डमा साइकल यात्री मोरङ सुनवर्षी नगरपालिका ६ पटियापाडा का ३० वर्षीय शत्रुघन साहको साइकल आफै अनियन्त्रित भई दुर्घटना हुँदा घाइते भई उपचारको लागि रंगेली अस्पताल लैजाने क्रममा मृत्यु भएको छ ।
यस्तै, शनिबार बेलुका ६ बजे उदयपुरको त्रियुगा नगरपालिका ११ मेन चोकस्थितमा पूर्वतर्फ जाँदै गरेको स१ह १६२० नम्बरको अटो र पिपलचोकबाट पूर्वतर्फ जाँदै गरेको को१९प ९६४६ नम्बरको मोटरसाइकल एक आपसमा ठक्कर खाई दुर्घटना एकजनाको मृत्यु भएको छ भने दुईजना घाइते भएका छन् ।
मृत्यु हुनेमा मोटरसाइकल पछाडि सवार त्रियुगा नगरपालिका ११ का ८५ वर्षीय कुलप्रसाद भण्डारी रहेका छन् उनको न्यूरो विराटनगरमा उपचारको क्रममा राति साढे ९ बजे मृत्यु भएको हो भने मोटरसाइकल चालक सप्तरी कञ्चनपुर नगरपालिका १२ का ५२ वर्षीय कमलप्रसाद पोखरेल र अटो चालक उदयपुर चौदण्डीगढी नगरपालिका ७ का ४२ वर्षीय नरबहादुर कार्की सामान्य घाइते भएका छन् । उनीहरुको जिल्ला अस्पताल उदयपुरमा उपचार भइरहेको छ । दुवै सवारी साधन जिल्ला प्रहरी कार्यालय उदयपुरको नियन्त्रणमा रहेको छ ।
यस्तै, बेलुका ६ बजे झापाको बिर्तामोड नगरपालिका ६ गिरीबन्दु टि स्टेट अगाडि पूर्व–पश्चिम राजमार्गमा नम्बर नखुलेको रातो रंगको २२० सिसी पल्सर मोटरसाइकल र विपरीत दिशातर्फ जाँदै गरेको प्र १–०१–०१४ प ६००७ नम्बरको स्कुटी एक आपसमा ठक्कर खाई दुर्घटना स्कुटीमा सवार स्कुटी चालक मेची नगरपालिका १० का ४२ वर्षीय डिल्ली कार्की, पछाडि सवार उनका छोरा १६ वर्षीय मनिष कार्की र अर्को मोटरसाइकल पछाडि सवार झापा हल्दीबारी गाउँपालिका २ का २१ वर्षीय पिजेश लामा घाइते भई उपचारको लागि बिएण्डसी अस्पताल बिर्तामोड लगिएको थियो ।
घाइतेमध्ये स्कुटी पछाडि सवार रहेका उनको राति ९ बजे उपचारको क्रममा मृत्यु भएको छ । दुर्घटनामा सलग्न रहेको अर्को मोटरसाईकल चालक झापा हल्दीबारी गाउँपालिका २ का २५ वर्षीय उमेश लामा मोटरसाइकलसहित फरार रहेकाले खोज तलास भइरहेको छ ।
यस्तै, राति साढे ११ बजे झापा मेचीनगर नगरपालिका १३ तेलिबारीस्थित पूर्व–पश्चिम राजमार्गमा पूर्वतर्फ जाँदै गरेको प्रदेश–१–०४–०१४प ३३४५ नम्बरको मोटरसाइकल र सोही दिशातर्फ जाँदै गरेको प्रदेश १–०४–००१ प ३९९५ नम्बरको मोटरसाइकल ठक्कर खाई दुर्घटना हुँदा घाइते भएका ४ जना घाइते भएका थिए ।
घाइते हुनेहरुमा ३३४५ नम्बरको मोटरसाइकल चालक झापा मेचीनगर नगरपालिका ८ का २१ वर्षीय अनिष गिरी, पछाडि सवार सोही स्थानका १८ वर्षीय अभिषेक श्रेष्ठ, ३९९५ नम्बरको मोटरसाइकल चालक मोरङ उर्लाबारी नगरपालिकाका २१ वर्षीय निकेश शिवकोटी र पछाडि सवार झापा मेचीनगर नगरपालिका ८ का २१ वर्षीय प्रविण मेचे रहेका छन् । घाइतेमध्ये अभिषेक श्रेष्ठको बिएण्डसी अस्पताल बिर्तामोडमा उपचारको क्रममा राति साढे १२ बजे मृत्यु भएको छ भने बाँकी ३ जना घाइतेहरुको सोही अस्पतालमै उपचार भइरहेको छ ।
यता सुनसरीको कोशी गाउँपालिका १ राजापोखरीस्थित पूर्व–पश्चिम राजमार्गमा साइकलबाट लडेर एकजनाको मृत्यु भएको छ ।
मृत्यु हुनेमा रामधुनी नगरपालिका ८ का ५९ वर्षीय सत्य नारायण साह रहेका छन् । शनिबार बिहान ८ बजे आफैले चलाएको साइकलबाट लडी घाइते भएका उनको जिल्ला अस्पताल इनरुवामा उपचारको क्रममा बिहान साढे ८ बजे मृत्यु भएको हो ।
यस्तै, मोरङको बेलबारी नगरपालिका ९ का ७२ वर्षीय हर्कबहादुर राईको लडेर मृत्यु भएको छ । दिउँसो ३ बजे सोही स्थान डाँगाबजार चौकमा रहेको काठको फलैचाबाट लडेर घटनास्थलमै मृत्यु भएको हो । उनलाई प्रेसरको बिरामी भएको आफन्तबाट बुझिएको छ ।
संखुवासभाको सभापोखरी गाउँपालिका ६ पात्ले दहस्थित सभाखोलाले बगाएका दुई बालकमध्ये एकजना मृत अवस्थामा फेला परेको छन् ।
यस्तै, अर्का बालक अझै बेपत्ता भएका छन् । मृत्यु हुनेमा सोही स्थानका भक्तबहादुर विकका ९ वर्षीय छोरा विपन विक रहेका छन् भने उनकै घरमा पाहुना आएका सभापोखरी गाउँपालिका १ का रहीबहादुर विकको ८ वर्षीय छोरा रैतिन विक बेपत्ता भएका छन् । दिउँसो १ बजे उनीहरु नुहाउने क्रममा खोलाले बगाएको थियो । घटनाको जानकारी पाएलगत्तै प्रहरी चौकी बाह्रबिसेबाट प्रहरी टोली खटि गई खोजतलास बिपनलाई बगाएको स्थानबाट अन्दाजी ५०० मिटर तल मृत अवस्थामा फेला पारिएको छ भने अर्का बालक रैतिनको खोजतलास भइरहेको छ ।